ԵՐԵՎԱՆ, 25 օգոստոսի – Sputnik. «Ձյունիկ» սառնարանային համալիրի շենքը 4-րդ անգամ պայթեցնելուց րոպեներ անց փլվեց։ Տեսանյութից երևում է, որ շենքի փլուզումը նույնիսկ աշխատանքը համակարգողների համար էր անսպասելի։
«Շենքի մեջտեղի հատվածը իջեցրինք առաջին պայթյունից հետո, երկրորդ և երրորդ անգամ խնդիր ունեցանք պայթուցիկ նյութի հետ` 80 տոկոսը չպայթեց։ Ստիպված էինք այնպես պայթեցնել, որ շենքը դանդաղ իջնի։ Հետաքննությունը կպարզի` ինչու չեն պայթել նյութերը»,-լրագրողների հետ զրույցում ասաց պայթեցման աշխատանքները համակարգող Վազգեն Պետրոսյանը։
Մինչ բոլորը նայում էին 4-րդ պայթյունից հետո կանգուն մնացած շենքին, Պետրոսյանը նշեց, որ շենքի նոր պայթեցում չի լինի, քանի որ այդ շենքի հետնամասում մեկ այլ շենք կա, որը չի կարելի վնասել։ Մասնագետը բացատրեց, որ շենքը առաջ է գալու ու դեպի աջ փլուզվի։
Կանխատեսումից րոպեներ անց «Ձյունիկի» շենքը փլուզվեց։
Հիշեցնենք, որ հուլիսի 8–ին` ժամը 17:00-ին, «ՆՈՐՏԵԽ ՇԻՆ» ընկերությունը պայթեցման եղանակով փլեցման աշխատանքներ կատարեց Երևանի Արշակունյաց 9/2 հասցեում տեղակայված «Ձյունիկ սառնարանի» շենքում։ Սակայն շենքի որոշ հատված մնացել է կանգուն։
2020-ի հունիսի 28–ին «Ձյունիկ սառնարանի» շենքում խոշոր հրդեհ էր բռնկվել։ Հրդեհաշիջման աշխատանքներում ներգրավվել էին 36 փրկարար և 11 միավոր տեխնիկա։ Դեպքի վայրում աշխատանքները վերահսկում էր ԱԻ նախարար Ֆելիքս Ցոլակյանը։
Ինչպես պարզվել էր՝ 3-րդ, 4-րդ և 5-րդ հարկերում այրվել էին փրփրապլաստ և ապակե մանրաթել (յուրաքանչյուր հարկում՝ մոտ 35 քմ)։ Հրդեհաշիջման աշխատանքները հատկապես բարդացնում էր այն հանգամանքը, որ այրվող հարկերում պատուհաններ չկան:
«Ձյունիկ սառնարանի» շենքը կպայթեցնեն. ԱԻՆ-ը հայտարարություն է տարածել
2019թ.–ի օգոստոսի 19-ին դարձյալ հրդեհ էր բռնկվել «Ձյունիկ սառնարան» ՍՊԸ-ի սառնարանային շինության 3-5 հարկերում: Այն մարելու համար հրշեջներից 6 օր պահանջվեց։
Մասնագետների գնահատմամբ` նման բարդության հրդեհ Հայաստանում վերջին 15 տարում չէր գրանցվել:
«Ձյունիկի» այրվող շենքում պատուհաններ չկան. հրշեջներն աշխատում են բարդ պայմաններում
