ԵՐԵՎԱՆ, 23 օգոստոսի – Sputnik. Ուսումնական հաստատությունների` պետական բյուջեի միջոցներից ֆինանսավորման նոր կարգի նախագծի վերաբերյալ քննարկման ժամանակ դասղեկների վարձատրության համար առաջարկվել է կիրառել 10-20 տոկոս հավելավճար` ըստ դասարանում աշակերտների թվի: Լուրը հայտնում է ՀՀ Կրթության, գիտության, մշակույթի և սպորտի նախարարությունը` հավելելով, որ նախարարությունում կայացած քննարկմանը մասնակցել են մարզպետարանների և Երևանի քաղաքապետարանի ներկայացուցիչներ։
Համաձայն նախագծով առաջարկվող բանաձևի՝ ֆինանսավորման հաշվարկման համար հիմք են հանդիսանում մի շարք տվյալներ, այդ թվում դասարանների տարեկան միջին թիվը, մեկ դասարանին ընկնող ուսուցչական դրույքների միջին թիվը, նվազագույն աշխատավարձը, տարբեր տիպի լրավճարներ և այլն:
«Բացի այդ, մեթոդ միավորման նախագահների համար առաջարկվում է 10 տոկոս հավելավճար: Միաժամանակ, նոր կարգի անցումային դրույթներով նախատեսվում է, որ եթե ֆինանսավորման նոր կարգի գործարկման պահին դպրոցներում առկա դրույքաչափերն ավելի բարձր են, քան նախատեսվում է նոր կարգով, ապա պահպանվում է ավելի բարձր աշխատավարձը»,–նշված է հաղորդագրության մեջ։
Մարզպետարանների ներկայացուցիչները քննարկման ժամանակ բարձրացրել են տարբեր հարցեր` կապված լիազոր մարմինների ֆինանսների վերաբաշխման գործառույթների, հաստիքացուցակների, պահպանման ծախսերի և այլ հարցերի հետ: Նրանց առաջարկվել է խնդիրների վերաբերյալ իրենց առաջարկները գրավոր ներկայացնել նախարարություն:
Համաձայն նախագծի` առանձին մոտեցմամբ է կատարվելու հատուկ և մասնագիտացված դպրոցների ֆինանսավորումը` հաշվի առնելով գիշերակացի և սննդի կազմակերպման հարցերը:
Դպրոցական դասագիրք, մեթոդ փոխելն այդքան հեշտ բան չէ. Արմեն Սարգսյան
Նշենք, որ ֆինանսավորման նոր կարգն ուժի մեջ է մտնելու 2021 թվականից: Ուսումնական հաստատությունների` պետական բյուջեի միջոցներից ֆինանսավորման նոր կարգի լրամշակումն ու հանրային քննարկումները շարունակվում են:
Հիշեցնենք, որ ֆինանսավորման նոր կարգը սահմանում է, որ հաստատությունների ֆինանսավորումը պետք է ապահովվի միասնական մոտեցմամբ։ Այսինքն` անկախ հաստատությունների ենթակայությունից՝ ֆինանսավորումն իրականացվում է ընդհանուր բանաձևով՝ ըստ իրականացվող ուսումնական ծրագրերի։
Առաջարկվող նոր բանաձևում, ի տարբերություն նախորդի, հաշվի է առնվում ոչ միայն սովորողների, այլ նաև տարրական, միջին և ավագ դպրոցներում դասարանների տարեկան միջին թիվը, որին ավելացվում է նաև ուսուցչական մեկ դրույքի համար սահմանված նվազագույն աշխատավարձի չափը՝ բազմապատկված մեկ դասարանին ընկնող ուսուցչական դրույքների թվով։
Հիմնական ամենակարևոր փոփոխություններից մեկն այն է, որ ֆինանսավորում է նախատեսված դասղեկության և մեթոդմիավորման ղեկավարին տրվող լրավճարների համար, որը հավասար է ուսուցչական մեկ դրույքի համար սահմանված նվազագույն աշխատավարձի 10 տոկոսին։
ՄԻՊ–ը հարցադրումներ է ուղարկել ԿԳՄՍՆ դպրոցներում աշակերտների դիմակ դնելու առնչությամբ
Նախկինում այդ գումարի վճարումը թողնված էր դպրոցի հայեցողությանը. դասղեկները և մեթոդմիավորման նախագահները վճարվում էին՝ հաշվի առնելով ուսումնական հաստատության ֆինանսական վիճակը, առանձին դեպքերում ընդհանրապես չէին վճարվում։
