ԵՐԵՎԱՆ, 21 օգոստոսի – Sputnik. Շախմատի համաշխարհային առցանց օլիմպիադայի առաջին տուրում Հայաստանի հավաքականը հաղթեց։
Հայ շախմատիստները 4:2 հաշվով պարտության մատնեցին Ռումինիայի թիմին։
Հայաստանի հավաքականին հաղթական միավորներ բերեցին Լևոն Արոնյանը, Էլինա Դանիելյանն ու Աննա Սարգսյանը: Հրանտ Մելքումյանն ու Լիլիթ Մկրտչյանը ոչ-ոքի ավարտեցին իրենց պարտիաները, իսկ Հայկ Մարտիրոսյանը պարտվեց։
Այսօր առաջին առցանց օլիմպիադայի մեդալների համար պայքարի մեջ են մտել 40 ուժեղագույն հավաքականներ, որոնք բաժանված են 4 խմբի: Հայաստանի հավաքականը Ռուսաստանի, Ալժիրի, Անգլիայի, Բուլղարիայի, Եգիպտոսի, Մարոկկոյի, Ռումինիայի, Թուրքիայի և Խորվաթիայի հավաքականների հետ նույն խմբում է:
Յուրաքանչյուր խմբի հաղթողները կանցնեն քառորդ եզրափակիչ։ Քառորդ եզրափակիչի ևս 4 ուղեգրերի համար կմրցեն այն թիմերը, որոնք կզբաղեցնեն երկրորդ և երրորդ տեղերը:
Եզրափակիչը տեղի կունենա «նոկաուտ» սկզբունքով։
Հիշեցնենք, որ հուլիսի 25-ին մեկնարկած օլիմպիադային մասնակցում են 163 թիմեր:
