Լևոն Ստեփանյանը դրական է գնահատում Վաղարշակ Հարությունյանին Նիկոլ Փաշինյանի գլխավոր խորհրդական նշանակելու որոշումը։ Նրա կարծիքով` այդ որոշումը նույնիսկ ուշացած է։
Ստեփանյանը, որն արդեն շնորհավորել է Հարությունյանին, համոզված է` վարչապետի կողքին պետք է լինի այդ մակարդակի զինվորական, որն ունի բարձր մասնագիտական կրթություն, մեծ շրջապատ Ռուսաստանում, որն այսօր մեր թիվ մեկ ռազմական գործընկերն է, անվտանգության երաշխավորը։
«Համոզված եմ, որ Վաղարշակն իր աշխատանքում կհաջողի, որովհետև ՀՀ զինվորականների շրջանում մեծ վստահություն է վայելում։ Բացի դրանից, նրա կրթական բազան, ծառայողական փորձը կօգնեն գլխավոր խորհրդականի պաշտոնում»,– Sputnik Արմենիային ասաց ՀՀ ազգային անվտանգության ծառայության սահմանապահ զորքերի նախկին հրամանատարը։
Ստեփանյանի կարծիքով` զինվորականի ներկայությունը վարչապետի կողքին կարևոր է նաև այն առումով, որ զինվորականը սովորաբար կարգապահ է, ճշտապահ, իր խոսքի տերը, չի ներում ուշացումներ, չի ներում, երբ կարգադրությունները չեն կատարվում, հետևաբար զինվորականի դաստիարակությունը մի փոքր այլ է։
Գեներալ–մայորի դիտարկմամբ` նրանք, ովքեր փորձում են քաղաքական առումով շահարկել Վաղարշակ Հարությունյանի նշանակումը, նկատի ունեն այն հանգամանքը, որ նա Ռոբերտ Քոչարյանի օրոք ազատվեց ծառայությունից ու զրկվեց կոչումից, բայց եթե անգամ նշանակումը կապեն այդ հանգամանքի հետ, ապա դա, ըստ Ստեփանյանի, միանշանակ խոսում է Վաղարշակ Հարությունյանի օգտին, հետևաբար նա ավելի հավատարիմ կլինի գործող վարչապետին։
Հիշեցնենք, որ Վաղարշակ Հարությունյանը երեկ է նշանակվել Փաշինյանի գլխավոր խորհրդական։
Նա 1999-2000 թթ-ին ՀՀ պաշտպանության նախարար է եղել։ 1999-ի հոկտեմբերի 27-ի ահաբեկչությունից հետո Հարությունյանի և այդ ժամանակվա ՀՀ նախագահ Ռոբերտ Քոչարյանի միջև մեծ կոնֆլիկտ էր սկսվել։ Տեղեկանալով ահաբեկչության մասին` Հարությունյանը հրահանգել էր փակել Երևան տանող ճանապարհները, Քոչարյանը դա որակել էր որպես ինքնագլուխ, անընդունելի գործողություն։
2002-ի հուլիսին Ռոբերտ Քոչարյանի հրամանագրով նա աստիճանազրկվել էր։ Սակայն 2019-ի օգոստոսին նախագահ Արմեն Սարգսյանը Քոչարյանի այդ հրամանագիրը ուժը կորցրած էր ճանաչել, և Հարությունյանի գեներալ-լեյտենանտի կոչումը վերականգնվել էր։
