Գարեգին Եղոյանը նշում է, որ չնայած սպասելիքներն Արթուր Մեսչյանից անհամեմատ մեծ էին, այդուհանդերձ նախագծերի որակը նրա պաշտոնավարման ընթացքում կտրուկ բարձրացավ, որովհետև այդ գործում հավանաբար Մեսչյանի պահանջով մասնագետներ են ներգրավվել։
«Կցանկանայի, որ լինեին ավելի մեծ համակարգային, սկզբունքային փոփոխություններ, որոնք Մեսչյանի պաշտոնավարման ընթացքում այդպես էլ տեղի չունեցան, ինչը ցավալի փաստ է հատկապես քաղաքաշինության ոլորտի համար։ Վերջին երկու տարում Երևանում ճարտարապետական առումով առանձնապես փոփոխություններ չեղան, հանգուցային հարցերը մնացին որպես այդպիսին, առանց լուծման»,–Sputnik Արմենիային ասաց ճարտարապետը։
Եղոյանի դիտարկմամբ` թեև եղան որոշակի խստացումներ, սակայն դրան զուգահեռ որոշ դեպքերում առանձին շինությունների համար այնուամենայնիվ տրվեցին թույլտվություններ։ Ըստ նրա` գլխավոր ճարտարապետի պարագայում չկան շատ լծակներ, նկատելի են օրենսդրական բացերը։
«Երևանը զարգացող քաղաք է, հետևաբար անհնար է, որ այն չաճի, սակայն կարևոր է, թե
ինչպես պետք է իրականանա աճը։ Այդ ամենը պետք է հիմնված լինի մայրաքաղաքի գլխավոր հատակագծի վրա, կադաստրի որոշումներն ու հողահատկացումները նույնպես մեծ համակարգի մաս են կազմում, որը պետք է գործի ներդաշնակորեն»,– նշեց ճարտարապետը։
Եղոյանը համոզված է, որ քաղաքաշինությունը միայն շենք կառուցելը չէ, ամեն ինչ պետք է բխի գլխավոր հատակագծից, որն իր հերթին ճարտարապետների ու նախագծողների կողմից պետք է ընկալվի որպես քաղաքաշինության ավետարան։
Հիշեցնենք, որ Երևանի քաղաքապետ Հայկ Մարությանը Երևանի գլխավոր ճարտարապետ Արթուր Մեսչյանին պաշտոնից ազատելու որոշում է կայացրել օգոստոսի 13-ին։ Մեսչյանն աշխատանքից ազատվել է այսօրվանից։ Նրա հրաժարականի դիմումի մասին Մարությանը հայտարարել էր օգոստոսի 4-ին կայացած մամուլի ասուլիսում`հիշեցնելով, որ Մեսչյանն ի սկզբանե ասել էր, որ գալիս է 2 տարով։
Ինչը կարող էր ստիպել Արթուր Մեսչյանին հրաժարվել պաշտոնից. Մինասյանի տեսակետը
