ԵՐԵՎԱՆ, 15 օգոստոսի – Sputnik. Արաբական Միացյալ Էմիրությունների և Իսրայելի միջև խաղաղության պայմանագրի կնքումից հետո Թուրքիան մտադիր է կասեցնել ԱՄԷ-ի հետ դիվանագիտական հարաբերությունները: Տեղեկությունը հայտնում է Ermenihaber-ը` հղում անելով Թուրքիայի նախագահ Ռեջեփ Թայիփ Էրդողանին։
Ավելի վաղ Թուրքիայի ԱԳՆ-ն հայտարարություն էր տարածել` նշելով, որ հիշյալ համաձայնագրով ԱՄԷ-ն անտեսում է պաղեստինցիների կամքը։ Թուրքիան ԱՄէ–ի պահվածքը կեղծավոր էր որակել։
Էրդողանն, արձագանքելով այդ համաձայնագրին, ասել է, որ Թուրքիայի ԱԳ նախարար Մևլութ Չավուշօղլուին Աբու Դաբիի հետ դիվանագիտական հարաբերությունները կասեցնելու վերաբերյալ հրահանգ է տվել:
Թուրքիայի նախագահի խոսքով` հնարավոր է նաև Աբու Դաբիից հետ կանչվի Թուրքիայի արտակարգ և լիազոր դեսպանը:
Նա վերահաստատել է Թուրքիայի աջակցությունը Պաղեստինի ժողովրդին:
Կայքը հիշեցնում է, որ Իսրայելի վարչապետ Բենյամին Նեթանյահուն և Աբու Դաբիի թագաժառանգ Մուհամմեդ Բեն Զայիդը ԱՄՆ նախագահ Թրամփի հետ հեռախոսազրույցից հետո հայտարարել են երկու երկրների միջև հարաբերություններ հաստատելու մասին:
Հունական և թուրքական նավերի միջև միջադեպ է գրանցվել. ԶԼՄ
Այս պայմանագիրը 1979 և 1994 թթ․ Եգիպտոսի և Հորդանանի հետ նմանատիպ համաձայնագրերից հետո 3-րդն է։ ԱՄԷ-ի իշխանություններն Իսրայելի հետ պայմանագիրը պատմական դիվանագիտական նվաճում են անվանել` հավաստիացնելով, որ հրեական պետության հետ հարաբերությունների նորմալացումը նրանց թույլ կտա ապահովել տարածաշրջանի անվտանգությունը:
Ինչպես պետք է Հայաստանն իրեն պահի թուրք–հունական կոնֆլիկտում. թուրքագետի մեկնաբանությունը
