ԵՐԵՎԱՆ, 12 օգոստոսի – Sputnik. ՀՀ փոխվարչապետ, պարետ Տիգրան Ավինյանն այսօր Ազգային ժողովում արտակարգ դրության երկարաձգման հարցով հրավիրված հատուկ նիստում, ներկայացնելով կառավարության որոշմամբ սահմանված մեղմացումները, հայտնեց, որ անձնական ավտոմեքենաներում դիմակ դնելու պահանջը վերացվելու է։ Այդ պահանջը պահպանվելու է հանրային տրանսպորտում ու տաքսիներում։
«Հանվելու է նաև հանրային վայրերում դիմակ դնելու կանոնը, օրինակ` բնության գրկում, անտառներում»,– ասաց Ավինյանը։
Պարետը հայտնեց նաև, որ կառավարությունն առաջիկայում վերանայելու է նաև հանրային սննդի օբյեկտներում մեկ սեղանի շուրջ նստելու համար սահմանված անձանց առավելագույն թիվը։ Որոշումը, նրա խոսքով, առաջիկայում կհրապարակվի։
Հիշեցնենք` մարտի 16–ից Հայաստանում արտակարգ դրություն է, որն արդեն մի քանի անգամ երկարաձգվել է։ Երկարաձգված արտակարգ դրության պայմանները որոշակի փոփոխությունների են ենթարկվել։ Տնտեսական շատ գործունեություններ թույլատրվել են, բայց սահմանվել են պարտադիր պահանջներ։
Մայիսի 18–ից Հայաստանում աշխատում է նաև հասարակական տրանսպորտը, բայց ուղևորներն ու վարորդները պետք է անպայման պաշտպանիչ դիմակով ու ձեռնոցով լինեն։
Հանրային բաց տարածքներում դիմակ դնելը նույնպես պարտադիր է։ Դիմակ կարող են չդնել միայն մինչև 6 տարեկան երեխաները, հեծանիվ վարողները, ֆիզիկական վարժություններ անողները և խրոնիկ շնչառական հիվանդություններ ու սրտային անբավարարություն ունեցողները (վերջինները պետք է իրենց մոտ ունենան համապատասխան հիվանդության փաստը հաստատող բժշկական փաստաթուղթ)։
Հուլիսի 13-ին կառավարությունը որոշեց արտակարգ դրության ռեժիմը երկարացնել մինչև օգոստոսի 12-ը, իսկ այսօրվա արտահերթ նիստում որոշեց երկարաձգել մինչև սեպտեմբերի 11–ը։
