ԵՐԵՎԱՆ, 8 օգոստոսի – Sputnik. ՀՀ առողջապահության նախարարի մամուլի խոսնակ Ալինա Նիկողոսյանը Facebook-ում պարզաբանել է, թե ինչու է «Նորք» ինֆեկցիոն կլինիկական հիվանդանոցի տնօրեն Մհեր Դավիդյանցը աշխատանքից ազատվելու դիմում գրել։
«Ուզում եմ հիշեցնել, որ դեռ տարեսկզբից երկու կենտրոնների` ՁԻԱՀ-ի կանխարգելման ազգային կենտրոնի և «Նորք» ինֆեկցիոն կլինիկական հիվանդանոցի միացման գործընթաց է սկսվել: Նոր ձևավորվող բժշկական կենտրոնում Մհեր Դավիդյանցին առաջարկվել էր ընդհանուր գծով տեղակալի պաշտոնը, որն ի սկզբանե ընդունվել էր վերջինիս կողմից, սակայն հետագայում նա հրաժարվել է այդ պաշտոնից»,– գրել է Նիկողոսյանը։
Նախարարի մամուլի քարտուղարը նաև հիշեցրել է, որ Արսեն Թորոսյանի հրամանով երկու բժշկական կենտրոնների տնօրեններն էլ արդեն ազատված են պաշտոնից՝ կապված նոր կենտրոնի ձևավորման գործընթացի հետ։ Երկու կենտրոնների միացումից հետո տնօրենի ժամանակավոր պաշտոնակատարին նշանակելու է նախարարը։
«Պարոն Դավիդյանցին առաջարկվել է նաև շարունակել համագործակցությունն իր համար ընդունելի այլ ֆորմատներով, օրինակ` գիտական, ուսումնական գործունեությամբ զբաղվելու»,– նշում է Նիկողոսյանը, բայց չի հստակեցնում` ընդունել է Դավիդյանցն այդ առաջարկը, թե ոչ:
«Նախարարությունը և նախարարը բարձր են գնահատում Մհեր Դավիդյանցի ներդրումը համավարակի դեմ պայքարի աշխատանքներում և ցավում են նրա նման որոշման համար»,– ասված է նախարարի խոսնակի տարածած հաղորդագրության մեջ։
Նշենք, որ օգոստոսի 7-ին, երբ հայտնի դարձավ Դավիդյանցի հրաժարականի մասին, Sputnik Արմենիան փորձեց պարզաբանում ստանալ նրանից։ Մհեր Դավիդյանցը խոստացավ մեր հարցերին պատասխանել 1-2 ժամ անց, բայց օրվա ընթացքում մեր հետագա զանգերն այդպես էլ անպատասխան մնացին։
Հիշեցնենք` երկու բուժհիմնարկների միավորման մասին որոշումը ՀՀ կառավարությունն ընդունել էր 2020թ–ի հունվարի 30-ին։
Որոշումը բուռն քննադատության արժանացավ ՁԻԱՀ-ի կանխարգելման հանրապետական կենտրոնի աշխատակիցների ու հիվանդների կողմից։
Ստեղծվող նոր ընկերությունում նախատեսվում էր ձևավորել նոր գործադիր մարմին, վերստուգող հանձնաժողով, մշակել նոր կանոնադրություն։ Պետությունը նորաստեղծ ընկերությունը պետք է գրանցեր եռամսյա ժամկետում։
Միավորման գործընթացը պաշտոնապես նախատեսվում էր սկսել մարտի 30-ից հետո։ Բայց կորոնավիրուսի համաճարակն ու ՀՀ–ում հայտարարված արտակարգ իրավիճակը խախտեցին նախատեսված բոլոր ժամկետները։ Նախարարության պարզաբանումից դատելով` կարող ենք փաստել, որ կառավարությունում այս գաղափարից չեն հրաժարվել։
