Կարեն Տոնոյանի դիտարկմամբ` կորոնավիորւսը դեռ ընթացքի մեջ է, գտնվում է դեռ հետազոտման փուլում, կան շատ հարցականներ, անհայտությունից առաջանում են բարդություններ, գրանցվում մահվան դեպքեր, որոնց պատճառները դեռ անհասկանալի են ոչ միայն մեզ, այլև ամբողջ աշխարհին։
«Ցանկացած օրգանիզմ յուրովի է ընդունում և դիմակայում կորոնավիրուսին, այստեղ կան էական տարբերություններ, կարող է անգամ նույն տարիքի մարդկանց մոտ վարակն ունենալ տարբեր ընթացք, ինչը պայմանավորված է մի շարք հանգամանքներով, օրինակ` ի՞նչ ապրելակերպ է ունեցել տվյալ անձը մինչ հիվանդանալը, ի՞նչ քանակությամբ ջուր է ընդունել, ի՞նչ սննդակարգ է ունեցել, զբաղվե՞լ է սպորտով, թե՞ ոչ, ունեցե՞լ է վատ սովորույթներ, ենթարկվե՞լ է նախկինում վիրահատությունների, մի խոսքով պատճառները կարող են շատ լինել»,– նշում է բժիշկը։
Տոնոյանի կարծիքով` հիմնական խնդիրն առնչվում է մարդու օրգանիզմի պաշարներին և դիմադրողականության աստիճանին, որոնց շնորհիվ մարդը պայքարում է հիվանդությունների դեմ, ընդ որում` պաշարներն օգտագործվում են վարակը հաղթահարելու ժամանակ, ինչից հետո վերականգնողական գործընթացը կարող է ընթանալ որոշակի դժվարությամբ։
Ինչպես է «Զվարթնոցն» ուղևորներին պաշտպանելու կորոնավիրուսից
«Եթե օրգանիզմը կարողանում է հաղթահարել վիրուսի փուլերը, մարդը դուրս է գալիս բարդ վիճակից, հակառակ պարագայում, ցավոք սրտի, առաջանում են լուրջ խնդիրներ, որոնք նույնպես կապված են օրգանիզմի յուրահատկությունների հետ։ Կարող են, օրինակ, առաջանալ տրոմբներ, թոքաբորբի սրացումներ, երիկամների անբավարարություն։ Բժիշկների օրենքն է. մենք չպետք է բուժենք հիվանդությունը, այլ պետք է բուժենք հիվանդին, այսինքն` պետք է ոչ թե բոլորին նշանակենք նույն դեղերը, այլ դրանք տանք` հետևելով հիվանդության ընթացքին»,– ասում է բժիշկը։
Տոնոյանի գնահատմամբ` ամենացավալի դեպքերն առնչվում են տարատեսակ տրոմբներին, երբ արձանագրվում են մահվան դեպքեր։ Պայքարն այդ առումով դժվար է, որովհետև բժիշկները բախվում են անկանխատեսելի երևույթների, քանզի սուր և բարդ վիճակներ կարող են առաջանալ յուրաքանչյուր անձի մոտ` անկախ տարիքից, նույնիսկ այն դեպքում, երբ նրա նկատմամբ կիրառվում են անհրաժեշտ բոլոր միջոցառումները։
Ռուսաստանցի բժիշկն ասել է` ում է հակացուցված կորոնավիրուսի դեմ պատվաստումը
