ԵՐԵՎԱՆ, 6 օգոստոսի - Sputnik. ՀՀ Կառավարությունը փոխում է զինծառայությունից տարկետում ստանալու կարգը։ Որոշումն ընդունվեց ՀՀ կառավարության այսօրվա նիստում։
Ներկայացնելով որոշման ընդունման անհրաժեշտությունը` ԿԳՄՍ նախարար Արայիկ Հարությունյանը նշեց, որ դրանով փորձ է արվում գիտության և կրթության բնագավառներում նշանակալի նվաճումներ ունեցող քաղաքացիներին աշխարհի լավագույն բարձրագույն ուսումնական հաստատություններ ընդունվելու և որակյալ կրթություն ստանալու հնարավորություն ընձեռել։
«Գործող կարգավորման համաձայն՝ բակալավրի կրթական ծրագրով սովորող կամ դիմորդ հանդիսացող քաղաքացին պարտադիր զինվորական ծառայության զորակոչից տարկետում կարող է ստանալ կարգի 7-րդ կետի պահանջներին համապատասխան նշանակալի նվաճումներ ունենալու արդյունքում, իսկ մագիստրատուրայի և ասպիրանտուրայի կրթական ծրագրերով սովորող կամ դիմորդ հանդիսացող քաղաքացին՝ 8-րդ կետի համաձայն։ Բայց, եթե վերջիններս ընդունվում էին աշխարհի լավագույն ուսումնական հաստատություններ` ուսումը շարունակելու, ապա զրկվում էին տարկետման իրավունքից»,– ասաց նախարարը։
Նրա խոսքով՝ սահմանվող նոր կարգով, տարկետման իրավունք ստացած քաղաքացիներին հնարավորություն կտրվի դրանից օգտվել մինչև նոր ուսումնական հաստատությունում ուսումնառության ավարտը։
Կեղծ բժշկական փաստաթղթերով ու կաշառքով ազատվել են զինծառայությունից. ԱԱԾ բացահայտումը
ՀՀ վարչապետ Նիկոլ Փաշինյանն էլ պարզաբանեց, որ գործող կարգով, ուսանողը, փաստորեն ավելի բարձր մակարդակի ուսումնական հաստատություն ընդունվելու պարագայում զրկվում էր տարկետման իրավունքից ու ստիպված էր նորից դիմել` նոր տարկետում ստանալու համար։
«Հիմա կրթության շարունակականությունն ապահովելու համար այդ տարկետումը կշարունակի մնալ ուժի մեջ մինչև 26 տարեկանը, բայց ոչ ավելի, որպեսզի դա չօգտագործվի պարտադիր զինվորական ծառայությունից խուսափելու համար»,– նշեց վարչապետը։
Ֆրանսիական համալսարանի ուսանողները խնդրի առաջ են կանգնած. տարկետում ստանալ չի լինում
Նշենք, որ կառավարությունը երեկ` օգոստոսի 5-ին, քննարկել է հանրակրթության նոր չափորոշիչը և վարչապետի խոսքով՝ առաջիկայում այն կընդունվի` կառավարության որոշմամբ։
