ԵՐԵՎԱՆ, 3 օգոստոսի – Sputnik. Դիմակավորված և զինված երկու անձ փորձել են թալանել Լոռու մարզի Ալավերդի քաղաքի «Մանկիկ» ոսկե զարդերի խանութը, հայտնում է ՀՀ քննչական կոմիտեն։
Դեպքը տեղի է ունեցել շաբաթ օրը՝ օգոստոսի 1-ին, առավոտյան 09:00-ի սահմաններում։ Երկու հոգի մտել են խանութ, հարձակվել վաճառողուհու վրա, կապել նրա բերանն ու ձեռքերը, ապա դանակի և զենքի գործադրմամբ, նրա կյանքի համար վտանգավոր սպառնալիքներ տալով, պահանջել և վերցրել են խանութի չհրկիզվող պահարանի բանալիները: Սակայն նրանք ո՛չ բանալիներով, ոչ էլ դեպի չհրկիզվող պահարանն ուղղված կրակոցներով չեն կարողացել բացել այն և փախել են։
Ըստ ՔԿ տեղեկությունների՝ այնտեղ կային շուրջ 10 մլն դրամ արժողությամբ զարդեր։
Դեպքի առթիվ հարուցվել է քրեական գործ՝ ՀՀ քրեական օրենսգրքի 175-րդ հոդվածի 3-րդ մասի 1-ին կետով (ավազակություն, որը կատարվել է առանձնապես խոշոր չափերով գույք հափշտակելու նպատակով) և 235-րդ հոդվածի 2-րդ մասի հատկանիշներով (ապօրինի զենք կրելը):
Ավազակային հարձակում Սյունիքում. դանակի սպառնալիքով կնոջից զարդեր ու հեռախոս են գողացել
Համաձայն shamshyan.com կայքի տեղեկությունների՝ խանութը պատկանում է ոստիկանության նախկին աշխատակից Գարեգին Հախինյանին։
Ձեռնարկվում են գործողություններ և օպերատիվ-հետախուզական միջոցառումներ՝ դեպքի բոլոր հանգամանքները, հանցագործություն կատարած անձանց ինքնությունը պարզելու և նրանց հայտնաբերելու ուղղությամբ:
