ԵՐԵՎԱՆ, 31 հուլիսի – Sputnik. Սահմանադրական դատարանի դատավորի թափուր տեղի համար Դատավորների ընդհանուր ժողովի ընտրության համար այս պահին առաջադրվել է 2 թեկնածու։ Տեղեկությունն այսօր լրագրողների հետ զրույցում հայտնեց ԲԴԽ անդամ Մեսրոպ Մակյանը։
Թեկնածուների կազմը, սակայն, նրա խոսքով, վերջնական չէ։ Դատավորներին օրենքն իրավունք է տալիս առաջադրվել ու ինքնաառաջադրվել ընդհուպ մինչև քվեարկության մեկնարկը։
«Բոլոր դատավորներին տեղյակ է պահվել, որ ովքեր ուզում են առաջադրվել, լավ կլիներ, որ մինչև երեկ առաջադրվեին, որպեսզի քվեաթերթիկում ներառվեին անունները` խնդիրը կազմակերպչական առումով ավելի արագ լուծելու տեսանկյունից։ Բայց չի բացառվում, որ ինչպես նոր թեկնածուներ լինեն, այնպես էլ առաջադրված թեկնածուները հրաժարվեն»,– ասաց Մակյանը։
Նշենք, որ ներկա պահին առաջադրված թեկնածուներն են ՀՀ վճռաբեկ դատարանի նախագահ Երվանդ Խունդկարյանը և Տավուշի մարզի առաջին ատյանի ընդհանուր իրավասության դատարանի նախագահ Արման Կուրեխյանը։
Սահմանադրական դատարանի դատավորի իր թեկնածուին ՀՀ Դատավորների ընդհանուր ժողովը կընտրի այսօր առաջադրված թեկնածուներից`փակ գաղտնի քվեարկությամբ։
Քոչարյանի գործով անկողմնակալ չլինելու որևէ հիմք չեմ տեսնում. ՍԴ դատավորի թեկնածու
Հիշեցնենք` Սահմանադրական վերջին փոփոխություններից հետո այս պահին ՍԴ–ում դատավորի երեք թափուր պաշտոն կա։ Դադարեցվել են Ալվինա Գյուլումյանի, Ֆելիքս Թոխյանի և Հրանտ Նազարյանի լիազորությունները։
Երեք թափուր տեղերի համար թեկնածուներ պետք է առաջադրեն ՀՀ կառավարությունը, Դատավորների ընդհանուր ժողովն ու ՀՀ նախագահը։
Կառավարությունն արդեն առաջադրել է իր թեկնածուին՝ իրավաբանական գիտությունների դոկտոր, պրոֆեսոր Վահրամ Ավետիսյանին։
