ԵՐԵՎԱՆ, 30 հուլիսի - Sputnik. «Իմ քայլը» հիմնադրամին 250 հազար դոլար կփոխանցվի որպես աջակցություն զինծառայողներին։ ՀՀ վարչապետ Նիկոլ Փաշինյանի տիկին Աննա Հակոբյանը Facebook-ի իր պաշտոնական էջում պատմել է, թե ով է ամերիկահայ այն բարերարը, որը նվիրաբերություն է արել հիմնադրամին։ Վարչապետի տիկնոջ խոսքով՝ հուլիսի 15-ի երեկոյան պետք է հեռախոսազրույց ունենար «Իմ քայլը» հիմնադրամի բարեկամ, ամերիկահայ գործարար, «PMA Venture Capital» խմբի հիմնադիր, բարերար Ջորջ Բաղումյանի հետ, բայց մոռացել է հեռախոսազրույցի մասին, քանի որ որպես բազմազավակ մայրիկ զբաղված է եղել երեխաների խնամքով, տնային հոգսերով։
«Պայմանավորված ժամից մեկ ժամ անց ինքս զանգահարեցի պարոն Բաղումյանին, ներողություն խնդրելու և հարցնելու, թե ինչի մասին պետք է խոսեինք: Եվ որքան մեծ էր իմ զարմանքը, երբ հեռախոսի այն կողմից լսեցի հետևյալ տեքստը. «Աննա, ես քեզ պետք է քառորդ միլիոն դոլար փոխանցեմ մեր զինվորների, մեր պաշտպանների համար»»,- գրում է Աննա Հակոբյանն ու հավելում, որ ցանկացած այլ օր այս խոսքերը կընկալվեին որպես հերթական բարեգործություն, գնահատելի նախաձեռնություն:
Բայց հայ-ադրբեջանական սահմանային լարվածության շրջանում այդ խոսքերը ոչ միայն ֆինանսական նշանակություն ունեին, այլև բարոյահոգեբանական։
«Չեք պատկերացնի, թե որքան կարևոր է նման պահի թիկունքին ուժ, հենարան, աջակցություն զգալը: Ես, իհարկե, պարոն Բաղումյանին շնորհակալություն հայտնեցի, թեև վստահ եմ` բառերով այդպես էլ չկարողացա արտահայտել զգացածս: Առաջարկեցի հետևյալը, որ մենք կմտածենք տարբեր ծրագրեր, իրեն կներկայացնենք, և ինքը կընտրի, թե կոնկրետ ինչ եղանակով մեր պաշտպաններին հասնի այդ գումարը»,- գրում է վարչապետի տիկինն ու նշում, թե Ջորջ Բաղումյանը, սակայն, որոշել է գումարը փոխանցել առանց նախապայմանների, որովհետև վստահություն կա։
Այսպիսով, հայրենիքի պաշտպաններին հասցեագրված 250 հազար դոլարը շուտով հիմնադրամին փոխանցված կլինի։
Նկարս եմ բերել, որ միշտ հիշեք ձեր գժուկին. սահմանին զոհված Աշոտը երազում էր գեներալ դառնալ
Այժմ քննարկում են, թե ինչ ուղղություն ընտրեն այդ գումարը զինվորներին և սպաներին հասցնելու համար: Վարչապետի տիկինը խոստացել է առաջիկայում այս մասին ավելի հանգամանալից տեղեկություն փոխանցել։
Զինծառայողների հիմնադրամը կփոխհատուցի նաև 2008-2014թթ. ընթացքում գրանցված դեպքերի համար
