ԵՐԵՎԱՆ, 29 հուլիսի – Sputnik. ՀՀ երկրորդ նախագահ Ռոբերտ Քոչարյանը «5-րդ ալիք», «Հ2» և «Երկիր Մեդիա» հեռուստաընկերությունների հետ հարցազրույցում ասել է` վերջին օրերին հայ–ադրբեջանական սահմանագոտում ծավալված մարտական գործողությունների պատճառն այն է, որ Ադրբեջանը փորձել է բարելավել իր դիրքերը Տավուշի սահմանի այդ հատվածում, բայց հայկական ուժերը ոչ միայն կանխել են այդ փորձերը, այլև արժանի հակահարված տալով` բարելավել են իրենց դիրքերը։
«Համարում եմ, որ մեր զինված ուժերն արձագանքել են ճիշտ, ժամանակին, արագ և համարժեք։ Դրանից հետո փորձելով վերադարձնել նախկին իրավիճակը` Ադրբեջանը սկսել է ռմբակոծել հայկական գյուղերը՝ օգտագործելով և՛ հրետանի, և՛ անօդաչու սարքեր։ Ըստ էության, այդ լոկալ մարտը վերածվեց ավելի մասշտաբային մարտական գործողությունների»,– նշել է ՀՀ երկրորդ նախագահը։
Քոչարյանի խոսքով`այս ամենը պետք է դիտարկել անցած 2 տարվա կտրվածքով՝ ինչ էր տիրում սահմանին, ինչ էր տիրում հայ-ադրբեջանական շփման գծի երկայնքով։
«Ըստ էության, մենք առաջին անգամ կանխել ենք Ադրբեջանի ցանկությունը՝ բարելավել իրենց դիրքերը։ Իսկ դիրքային առավելությունը չափազանց կարևոր է։ Ընդհանրապես զինվորականները պետք է համարեն, որ այս հակամարտությունը լուծում չունի։ Սա տևելու է շատ և շատ երկար, և եթե քո դիրքը հարմար է (մարտական դիրքի մասին է խոսքը), ապա դու երկար տարիներ ունենում ես շատ քիչ գլխացավանք, և հակառակը՝ մյուս կողմի համար»,–շեշտել է Քոչարյանը` նշելով, որ վերջին 2 տարվա ընթացքում գրեթե ոչինչ չի արվել դիրքերը բարելավելու ուղղությամբ։
ՀՀ երկրորդ նախագահի խոսքով` հակառակորդը երկու տարի անարգել բարելավել է իր դիրքերը։ Ըստ նրա` այս ամենից պետք է հետևություններ անել, որովհետև պարզվեց՝ Ադրբեջանի նախագահն այդքան էլ կոնստրուկտիվ չէ, Ադրբեջանը այդքան էլ խաղաղասեր չէ, և Ադրբեջանի ժողովուրդն այդքան էլ պատրաստ չէ խաղաղության։
«Իսկ մեր հանրությանն ինչո՞վ էին «կերակրում» հատկապես Դուշանբեից հետո։ Որ ունենք շատ կոնստրուկտիվ տրամադրված հակառակորդ, որի հետ բանակցում ենք, և եթե հանկարծ իրենք չգնան հարցի կարգավորման խաղաղ ճանապարհով, ապա մենք կդիմենք Ադրբեջանի ժողովրդին։ Հիմա ի՞նչ մնաց այս 2 տարում որդեգրված մոտեցումից։ Դուք ինձ ասեք՝ մի բան մնա՞ց, թե՞ չմնաց։ Նույնիսկ պատերազմի ժամանակ` 91-94 թվականներին, այսպիսի բախումներ հայերի և ադրբեջանցիների միջև Մոսկվայում կամ Միացյալ Նահանգներում երբեք չեն եղել։ Հիմա մենք պետք է ֆիքսենք երկու չափազանց կարևոր փաստ․ մենք այսօր ունենք ոչ միայն ռևանշի ձգտող կառավարություն Ադրբեջանում, այլև ռևանշի ձգտող ժողովուրդ Ադրբեջանում։ Այս 2 հանգամանքը միանում են իրար, և պատերազմի վերսկսման վտանգը շատ ավելի մեծ է լինում։ Մենք պետք է հասկանանք, որ այլևս ժողովրդին դիմելու բանաձևը, կառավարության կոնստրուկտիվիզմի հետ այլևս հույսեր կապելու բանաձևը չկա, և կառավարությունը այսօր պետք է խոստովանի, որ այս 2 տարվա ընթացքում այս հարցի շուրջ սխալ քաղաքականություն է վարել»,–նշեց նա։
Հիշեցնենք, որ հուլիսի 12–ից իրավիճակը սրվել էր հայ–ադրբեջանական սահմանի Տավուշի հատվածում։ Հուլիսի 12–ին` ժամը 12:30-ի սահմաններում, Ադրբեջանի զինված ուժերի զինծառայողները ՈւԱԶ մակնիշի ավտոմեքենայով Տավուշի ուղղությամբ ՀՀ պետական սահմանը խախտելու փորձեր էին արել: Հայկական կողմի նախազգուշացումից հետո Ադրբեջանի զինծառայողները, թողնելով ավտոմեքենան, վերադարձել էին իրենց դիրքեր:
Դրանից հետո հակառակորդը պարբերաբար վերսկսում էր գնդակոծությունն ինչպես հայ դիրքապահների, այնպես էլ բնակավայրերի ուղղությամբ։
Պաշտոնական տվյալներով՝ Ադրբեջանն ունի 13 զոհ, վիրավորների մասին որևէ բան չի հաղորդվում, իսկ հայկական կողմը 5 զոհ ունի, 36 վիրավոր (ևս մեկը խաղաղ բնակչությունից)։
