ԵՐԵՎԱՆ, 28 հուլիսի — Sputnik. Քրիստիան Խիմենեսը և Հրայր Մկոյանն այսօրվանից կհամալրեն «Արարատ» ֆուտբոլային ակումբը։ Տեղեկությունը հայտնվել է ակումբի պաշտոնական Facebook–ի էջում։
«Ուրախ ենք տեղեկացնել, որ ՖԱ «Արարատը» պայմանագրեր է կնքել պաշտպաններ Քրսիտիան Խիմենեսի և Հրայր Մկոյանի հետ: Խիմենեսը «Արարատի» կազմը համալրել է «Լոռիից», իսկ Մկոյանի վերջին ակումբը եղել է «Շիրակը»»,–ասված է հայտարարության մեջ:
33-ամյա Հրայր Մկոյանը Հայաստանում հանդես գալու ահռելի փորձ ունի: Նախկինում խաղացել է «Ուլիս», «Միկա» ակումբներում, պաշտպանել է «Ալաշկերտի», «Գանձասար-Կապանի», «Արարատ-Արմենիայի» գույները, ինչպես նաև հանդես է եկել «Արարատում»: Մկոյանը հարուստ կարիերայի ընթացքում եղել է նաև «Էսթեղլալ», «Բուդեյովիցե», «Սպարտակ Նալչիկ» ակումբներում:
Նա Հայաստանի ազգային հավաքականում անցկացրել է ավելի քան 40 հանդիպում:
Իսկ Քրիստիան Խիմենեսը մինչ «Լոռի» տեղափոխվելը հանդես է եկել իսպանական «Ալկալա» ակումբում:
ՖԱ «Արարատը» բարի գալուստ և հաղթանակներ է մաղթել իր նորեկներին։
Վարդան Մինասյանն այլևս «Արարատ-Արմենիայի» գլխավոր մարզիչը չէ
Նշենք, որ օրեր առաջ հայտնի դարձավ, որ «Արարատ» ֆուտբոլային ակումբը լքել են մի շարք ֆուտբոլիստներ` Կոելո Վիեյրա Վիկտոր Հուգոն, Սանտոս Դաս Նևես Խամեսը, Իգոր Գաբրիել Ագուիարը, Ռաֆայել Էնրիկեն, Պավել Ստեպանեցը, Դավիդ Դավիդյանը, Թոմաս Ֆիբելը, Դմիտրի Ռիժովը, Զուրաբի Արզիանին, Արունա Լուկմանը, Օսենի Գանիյու Բոլաջին, Վեսլեն Ժունիորը, Կոնստանտին Մորոզովը և Դենիս Դեդեչկոն։
