Արարատի մարզում գտնվող Ազատի ջրամբարին վերևից` մի քանի տասնյակ մետր բարձր բարձրությունից ենք նայում. ջրի մեջ տեղ–տեղ «կղզյակներ» են երևում, որոնք ջրամբարի տեսքն ավելի խորհրդավոր են դարձնում։ «Կղզյակները», սակայն, լավ օրից չէ, որ առաջացել են` ջրի նվազ քանակի մասին են հուշում։ 70 միլիոն խմ տարողությամբ Ազատի ջրամբարն այս օրերին լեփ–լեցուն չէ, սակայն պատճառն այն չէ, որ տարին ջրառատ չի եղել։ Այս տարի մայիսին ջրամբարը լցվել էր մինչև վերջ։
Հուլիսի 23-ին Ջրային կոմիտեի նախագահ Կարեն Սարգսյանը հայտնել էր` տարին ջրառատ չի եղել, և բոլոր հողամաս ունեցողներին մեկ հարց է հետաքրքրում` արդյո՞ք ջրավազաններում առկա ջուրը կբավարարի մինչև ոռոգման սեզոնի ավարտը։
Ի տարբերություն մյուսների, Ազատի ջրամբարն այն ջրամբարներից մեկն է, որի «բախտն այս տարի բերել» է` Ազատ գետը բավական ջուր է բերել իր հետ, և մինչև ոռոգման սեզոնի սկսելը առատությունից ջուրն անգամ թափվում էր։
Ջրային կոմիտեի նախագահի տեղակալ Կարեն Դաղբաշյանը Sputnik Արմենիայի հետ զրույցում տեղեկացրեց` այս պահին 43 մլն խմ ջուր կա ջրամբարում, իսկ մնացածն օգտագործվել է ոռոգման համար։
«Այս պահին ջրամբարում եղած ջրի քանակն այնքան է, ինչ նախորդ տարվա նույն շրջանում։ Ջրամբարի իշխման տակ գտնվող տարածքների` Արտաշատ ՋՕ–ի, Դվինի տարածաշրջանի և Ազատի քառաստիճան պոմպակայանների միջոցով ոռոգվող հողատարածքների համար մինչև ոռոգման սեզոնի ավարտը եղած ջրի պաշարը կբավարարի»,–ասաց Դաղբաշյանը։
Նրա խոսքով` նախորդ տարի ոռոգման սեզոնի ավարտից հետո դեռ ջրամբարում ջուր էր մնացել, այնպես որ անհանգստանալու կարիիք չկա։ Դաղբաշյանը հայտնեց` ջրամբարում վերանորոգման խնդիրներ կան` փականային հանգույցներում պետք է աշխատանքներ կատարվեն։ Խոսքը երկաթե կառուցվածքների մասին է, որոնք ժամանակի հետ մաշվում են։
Կապույտ Սևանի «կանաչ օրերը»․ Հայաստանի գոհարը փրկելու 3 քայլ
Ինչ վերաբերում է ջրի կորստին, ապա նման խնդիր չունի Ազատի ջրամբարը` ջրի կորուստ լինում է միայն բնական եղանակով, երբ եղանակային պայմաններից ելնելով ջուրը գոլորշիանում է։
Ջրային ռեսուրսների մասնագետ, բնապահպան Քնարիկ Հովհաննիսյանը, սակայն, համաձայն չէ այն կարծիքի հետ, որ տարին ջրառատ չի եղել։ Ի դեպ, Հովհաննիսյանը Ձորաբղյուրում ամառանոց ունի, որը մեխանիկական եղանակով ոգոռվում է հենց Ազատի ջրամբարի ջրով։ Նա ասում է` ի տարբերություն նախորդ տարվա, այս տարի իր ամառանոցի համար նախատեսված պլանով ջուր են ստացել։
«Անցած տարի անգամ բողոքի ակցիա արեցինք` ոռոգման ջրի խնդիրը բարձրացնելով, սակայն այս տարի միայն մեկ անգամ ջուր չենք ստացել, այն էլ` վթար էր եղել։ Ոչ թե ջրառատ տարի չի եղել, և ջրամբարներում ջրի քանակը քիչ է, այլ ջրային պաշարների ճիշտ կառավարման հարց կա»,–ասաց Հովհաննիսյանը։
Ծիծեռնակաբերդի հարակից տարածքում ինքնահոս ոռոգման համակարգ է անցկացվում. տեսանյութ
Բացի այդ, ըստ նրա, մեր ջրամբարները «մաղ» են. դրանք դատարկվելուց հետո հարկավոր է աշխատանքներ կատարել` խոռոչները, անցքերը փակել, որպեսզի հետո այնտեղ լցվող ջուրը մնա իր տեղում։ Հովհաննիսյանի խոսքով` եթե ժամանակին չզբաղվեն այդ խնդիրների լուծմամբ, ապա քանի գնա` ջրամբարն ավելի շատ կնմանվի մաղի, իսկ մաղում ջուր պահել հնարավոր չէ։
Ինչ վերաբերում է Ազատի ջրամբարում եղած ջրի քանակին, ապա նա, ուսումնասիրելով մեր` տեղում արված լուսանկարները, նշեց` այնպես չէ, որ ջրամբարում եղած ջրի պաշարը մեծ է։ Ջրային ռեսուրսների մասնագետը հույս ունի` ջրավազաններում եղած ջրային` ոչ մեծաքանակ պաշարները կբավարարեն մինչև ոռոգման սեզոնի ավարտը։
