ԵՐԵՎԱՆ, 25 հուլիսի – Sputnik. «Հրապարակ» օրաթերթը գրում է, որ ՀՀ վարչապետ Նիկոլ Փաշինյանի որոշմամբ կադաստրի պետի տեղակալ նշանակված Նարինե Ավագյանն արդարադատության նախկին նախարար, ՀՀԿ-ական նախկին պատգամավոր Արփինե Հովհաննիսյանի օգնականն էր:
Պարբերականը հիշեցնում է, որ Նարինե Ավագյանը Հովհաննիսյանի օգնականն է եղել, երբ վերջինը ԱԺ պետաիրավական հարցերի հանձնաժողովի նախագահն էր:
«Այս նշանակումն իշխող թիմում բուռն քննարկումների տեղիք է տվել․ շատերի կարծիքով՝ չի կարելի այդքան «իջնել» և նախկինում միջին օղակներում աշխատած, առավել ևս նախկինների օգնականներին բարձր պաշտոնների նշանակել։ Սա ցույց է տալիս այս իշխանության կադրային սնանկությունը»,- գրում է թերթը։
Լրատվամիջոցը նաև հետաքրքրվել է, թե ինչ կարգով է կատարվել հիշյալ նշանակումը և պարզել, որ թեև այդ պաշտոնի համար մրցույթ է հայտարարվել, սակայն Նարինե Ավագյանի համար միջնորդել է Վերաքննիչ քաղաքացիական դատարանի նախագահ Արսեն Մկրտչյանը, որի մոտ ևս Նարինե Ավագյանն աշխատել է որպես օգնական:
ՀՀ–ում պաշտոնյաները ստիպված կլինեն հայտարարագրել թանկարժեք գնումներն ու ուղևորությունները
Հիշեցնենք՝ Նարինե Ավագյանին կադաստրի պետի տեղակալ նշանակելու որոշումը ՀՀ վարչապետ Նիկոլ Փաշինյանը ստորագրել էր հուլիսի 22-ին:
