ԵՐԵՎԱՆ, 24 հուլիսի – Sputnik. ՌԴ-ում ՀՀ դեսպանատունը, Հայ առաքելական եկեղեցու Ռուսաստանի և Նոր Նախիջևանի թեմերը և Ռուսաստանի հայերի միությունը համատեղ հայտարարություն են տարածել։
«ՌԴ տարածքում վերջին օրերին տեղի ունեցող իրադարձությունները ոչ միայն լուրջ մտահոգություն են ծնում Ռուսաստանի մեծաթիվ հայ համայնքի շրջանում, այլև փաստացի մի շարք մարտահրավերներ են պարունակում Ռուսաստանում ազգամիջյան համերաշխության համար»,–նշված է հայտարարության մեջ։
Ընդգծվում է, որ այս օրերին, ցավոք, բախվել ենք Ադրբեջանի կողմից հայ-ադրբեջանական սահմանի լարվածությունը ՌԴ տարածք տեղափոխելու փորձի հետ, որով կոնֆլիկտային օջախներ են ստեղծվում երկու ժողովուրդների համայնքների միջև։
«Ակնհայտ է, որ լարվածությունը սրելուն ուղղված բազմաթիվ սադրանքները Մոսկվայի և Ռուսաստանի այլ քաղաքներում, այդ թվում սոցցանցերի ռուսական տիրույթում, կանխամտածված բնույթ են կրում և նպատակ ունեն հայ համայնքի ներկայացուցիչներին ներքաշել օրենքով արգելված տարբեր գործողությունների մեջ։
Այդ առիթով դիմում ենք ՌԴ-ի տարածքում բնակվող մեր հայրենակիցներին՝ խնդրելով չմասնակցել որևէ նախաձեռնության, ակցիայի և հավաքի, ինչպես նաև զերծ մնալ սոցցանցերում և տարբեր մեդիա հարթակներում պատասխան գործողությունների դիմելու կոչերից»,–ասված է հայտարարության մեջ։
Հայտարարության հեղինակները նաև խնդրում են զգոնություն ու զսպվածություն դրսևորել, նախկինի պես պահպանել ՌԴ օրենքները, մշտական կապի մեջ լինել ՌԴ-ում ՀՀ դեսպանատան, Հայ առաքելական եկեղեցու Ռուսաստանի և Նոր Նախիջևանի թեմի և Ռուսաստանի հայերի միության հետ, ինչպես նաև հնարավոր սադրանքների դեպքում դիմել իրավապահ մարմիններին։
«Հայտնում ենք նաև, որ ստեղծված իրավիճակին լուծում տալու համար մենք շարունակում ենք սերտ կապի մեջ գտնվել ՌԴ իրավապահ մարմինների և իշխանությունների հետ»,–նշված է հայտարարությունում։
Սպառնալիքներ Սան Ֆրանցիսկոյի հայկական դպրոցի պատերին. վանդալները գործի են անցել
Ընդգծվում է, որ մեր համախմբվածությունը, համակարգված գործողությունները ՌԴ գործող օրենսդրության շրջանակում մեր առջև ծառացած հարցերի լուծման գրավականն են։ Ավելի վաղ համացանցում տեսանյութեր էին տարածվել ադրբեջանցիների գիշերային հարձակումների մասին։ Դատելով մի տեսանյութից՝ մի խումբ ադրբեջանցիները ծեծել են հայկական համարներով մեքենայում գտնվող տղամարդու։ Դրանից հետո ադրբեջանցիների՝ հայերի վրա հարձակումների այլ տեսանյութեր էլ տարածվեցին։ Նաև տեղեկություն կա, որ հայերից մեկին դանակով վնասվածք է հասցվել։
Ոստիկանները 13 մարդ են ձերբակալել։
Մոսկվայում հարձակվել են «Հայկական տուն» խանութի վրա. տեսանյութ
Տարբեր երկրներում ապրող հայերի ու ադրբեջանցիների հարաբերությունները սրվել են հայ-ադրբեջանական սահմանին տիրող իրավիճակի պատճառով։ Բախումներ են գրանցվել Ռուսաստանում, Ֆրանսիայում, ԱՄՆ-ում, Լեհաստանում, Լիտվայում և այլ երկրներում։
