ԵՐԵՎԱՆ, 23 հուլիսի — Sputnik. ՀՀ քննչական կոմիտեն փոխգնդապետ Արա Մխիթարյանին ծեծի ենթարկելու դեպքի առնչությամբ մանրամասներ է հայտնել։
Նշենք, որ այս գործով մեղադրանք էր առաջադրվել Վայոց Ձորի նախկին մարզպետ Տրդատ Սարգսյանի օգնական Հարություն Գրիգորյանին։ Մեղադրյալի կարգավիճակում է նաև Գրիգորյանի եղբայրը՝ Զավեն Գրիգորյանը։ Միջադեպից մեկ շաբաթ անց Տրդատ Սարգսյանը մարզպետի պաշտոնից հրաժարական էր տվել, բայց օրերս հայտնի դարձավ, որ նա «Քաղաքացիական պայմանագիր» կուսակցության աշխատակազմի ղեկավար է նշանակվել։
«Պարզվել է դեպքի ընթացքը. 2019թ. սեպտեմբերի 17-ին` ժամը 22:30-ի սահմաններում, աննշան հարցի պատճառով վիճաբանություն է սկսվել Մխիթարյանի և Եղեգնաձոր քաղաքի բնակիչ Հարություն Գրիգորյանի միջև։ Վերջիններս սկսել են միմյանց քաշքշել ու հայհոյել: Մխիթարյանի ընկերները փորձել են դադարեցնել վիճաբանությունը, բայց Գրիգորյանը զանգահարել է մտերիմներին և եղբորը` նրանց կանչելով դեպքի վայր»,–նշված է ՔԿ հաղորդագրության մեջ:
Որոշ ժամանակ անց վերջիններս մի քանի ավտոմեքենաներով եկել են դեպքի վայր, որտեղ Հարություն Գրիգորյանն անսպասելի մոտեցել է Մխիթարյանին և բռունցքով հարվածել է նրա դեմքին։ Մխիթարյանը վայր է ընկել, որից հետո Հարություն Գրիգորյանը, նրա եղբայրը և գործով ինքնությունները չպարզված մի խումբ անձինք ոտքերով, նաև գործով չպարզված առարկայով բազմաթիվ և անկանոն հարվածներ են հասցրել գետնին ընկած Մխիթարյանի գլխին։
Միջադեպի ժամանակ ծեծի է ենթարկվել նաև Մխիթարյանի ընկերներից մեկը, որն իր մարմնով կռացել է ընկերոջ վրա՝ փորձելով նրան պաշտպանել հարվածներից:
Քննչական կոմիտեն հաստատել է Վայոց Ձորի նախկին մարզպետի անմեղությունը
Հարություն Գրիգորյանին մեղադրանք է առաջադրվել՝ ՀՀ քրեական օրենսգրքի 112-րդ հոդվածի (դիտավորությամբ առողջությանը ծանր վնաս պատճառելը) 2-րդ մասի 6-րդ կետով և 118-րդ հոդվածով (ծեծ): Նրա նկատմամբ որպես խափանման միջոց է ընտրվել կալանավորումը: Վերջինիս վերաբերյալ մասն առանձնացվել է առանձին վարույթ և մեղադրական եզրակացությամբ ուղարկվել դատարան:
Գործով դեռևս չպարզված անձանց, ինչպես նաև Զավեն Գրիգորյանի վերաբերյալ մասն առանձնացվել է առանձին վարույթում, որի նախաքննությունը շարունակվում է:
«Ծեծված փոխգնդապետի մոտ նկատվում է դրական դինամիկա». ԳՇ պետը`զինծառայողի վիճակի մասին
Հիշեցնենք, որ քրգործով Զավեն Գրիգորյանին մեղադրանք էր առաջադրվել ՀՀ քրեական օրենսգրքի 112-րդ հոդվածի (դիտավորությամբ առողջությանը ծանր վնաս պատճառելը) 2-րդ մասի 6-րդ կետով: Փոխգնդապետը սեպտեմբերի 17-ից մինչև հիմա գտնվում է զինվորական հոսպիտալում, դեռևս կոմայից դուրս չի եկել։ Նա ամուսնացած է, ունի 10 տարեկան որդի, 27 տարի ծառայել է հայկական բանակում։
