ԵՐԵՎԱՆ, 23 հուլիսի — Sputnik. Այս պահին, նախորդ տարվա համեմատ, Սևանից 19 մլն խմ ավել ջրառ է իրականացվել. պատճառը գետերում ջրերի սակավությունն է։ Այսօր կազմակերպված մամուլի ասուլիսի ժամանակ հայտնեց Ջրային կոմիտեի նախագահ Կարեն Սարգսյանը։
«Այս տարի սակավաջուր է, ինչի համար էլ ավելի շատ ենք ջրառ իրականացրել, քան նախորդ տարի։ Մյուս կողմից, սակայն, այս տարի Արփա–Սևան թունելով Սևան ենք տեղափոխել շուրջ 20 մլն խմ ավել ջուր, քան նախորդ տարի։ Հիմա փորձում ենք անել ամեն ինչ, որպեսզի նախատեսված 170 մլն խմ ջրառից բացի, հավելյալ ջրառի կարիք չլինի»,–ասաց Սարգսյանը։
Անդրադառնալով ջրամբարների լցվածությանը` Սարգսյանը հայտնեց, որ ուրախանում էինք, որ տաք ձմեռ ենք ունեցել, բայց դա խիստ ազդել է ջրամբարներում ջրի կուտակման վրա։ Այս պահին, ըստ Ջրային կոմիտեի նախագահի, ջրամբարներում առկա է թերի լցվածություն։ Այսինքն` այս դեպքում սկսում են մեխանիկական եղանակով ոռոգումը կատարում, ինչն էլ իր հերթին բերում է հավելյալ էլեկտրաէներգիայի ծախսի։
Խոսելով Վեդու ջրամբարի շինարարության մասին` Սարգսյանը նշեց` ընթացքն այնքան էլ գոհացուցիչ չէ։ Նրա խոսքով` աշխատանքների տեմպն իրենց չի բավարարում, ինչը կախված էր նաև կորոնավիրուսային իրավիճակից։
Ի դեպ, ջրամբարի շինարարական աշխատանքների ավարտման վերջնաժամկետը 2021-ի առաջին կիսամյակն է. այս պահին աշխատանքի 75-80 տոկոսը կատարված է։
Հիշեցնենք, որ Վեդու ջրամբարը կառուցվում է Վեդի գետի աջափնյա սելավատարի վրա: Վեդիի ջրամբարի կառուցմամբ ոռոգման ցանցի կորուստները կկրճատվեն 20-25%-ով, կնվազի Սևանա լճից ոռոգման նպատակով ջրապահանջարկը, էլեկտրաէներգիայի տարեկան տնտեսումը կկազմի մոտ 19.0մլն կվտ/ժամ։
Սևանը կրկին կանաչել է. ինչ նոր խնդիրներ է «խոստանում» մոտեցող շոգը լճին
Ծրագիրը ֆինանսավորվում է Զարգացման ֆրանսիական գործակալության (AFD) վարկային միջոցներով և ՀՀ կառավարության համաֆինանսավորմամբ։ Ծրագրի ընդհանուր արժեքը կազմում է 90 մլն եվրո, այդ թվում՝ 75 մլն եվրո վարկային միջոցներ։
