ԵՐԵՎԱՆ, 21 հուլիսի – Sputnik. ՀՀ փոխվարչապետ, պարետ Տիգրան Ավինյանը հայտնում է, որ նվազել են տարբեր կազմակերպություններում արձանագրվող խախտումները, հետևաբար՝ կասեցման որոշումները:
«Եթե հունիսի առաջին տասնօրյակում իրականացված 6842 ստուգումների արդյունքում արձանագրվել է 1339 խախտում (19.6%), ապա հուլիսի նույն ժամանակահատվածում իրականացված 7491 ստուգումների արդյունքում արձանագրվել է 377 խախտում (5%)»,– Facebook սոցցանցի իր էջում գրել է Ավինյանը։
Նա տեղեկացնում է, որ հակահամաճարակային միջոցառումների շրջանակում տեսչական մարմինների կողմից մինչ օրս իրականացվել է 54 013 ստուգում: Սահմանված նորմերի խախտման դեպքերով նույն ժամանակահատվածում կայացվել է 4669 կազմակերպության գործունեության կասեցման որոշում:
Արմավիրում հանրային սննդի կետերում խախտումներ չեն գրանցվել անգամ «խոշորացույցով»
Ի դեպ, տեսչական ստուգումներն իրականացվում են շաբաթվա բոլոր օրերին։ Ավելին, կախված տնտեսվարողի գործունեությունից, նաև գիշերային ժամերին: Բոլոր ստուգվողներին տրամադրվում են խորհրդատվություն և խախտումների վերացման ցուցումներ։
Հիշեցնենք, որ կորոնավիրուսային իրավիճակից ելնելով` մարտի 16–ից Հայաստանում արտակարգ դրություն է, որն արդեն մի քանի անգամ երկարաձգվել է։
Հուլիսի 13-ին կառավարությունը որոշեց արտակարգ դրության ռեժիմը երկարացնել մինչև օգոստոսի 12-ը։
Ըստ այդմ` կազմակերպություններում աշխատակիցների միջև պետք է ապահովված լինի անհրաժեշտ սոցիալական հեռավորություն, բոլորը լինեն դիմակներով։ Կազմակերպությունները պետք է նաև սանիտարահիգիենիկ պայմաններ ապահովեն ձեռքերը հաճախ լվանալու համար։
100 հոգանոց միջոցառում ռեստորանում, խախտումներ «Երևան Սիթիում». ՍԱՏՄ ստուգայցերի արդյունքը
