ԵՐԵՎԱՆ, 18 հուլիսի — Sputnik. Չեչնիայի Հանրապետության ղեկավար Ռամզան Կադիրովը կոչ է արել Հայաստանին ու Ադրբեջանին դադարեցնել էսկալացիան սահմանի վրա ու վերադառնալ խաղաղ բանակցություններին։ Նա գրել է դա իր Telegram-ալիքում։
Կադիրովը նշել է, որ չեչեն ժողովուրդը լավ գիտի խաղաղության գինը, ինչպես նաև այն ցավը, որը բերում է պատերազմը։ Չեչնիայում իրենց փորձով գիտեն, որ ավելի լավ է կանխել պատերազմն ու ամեն ինչ անել բարդ հարցերը խաղաղ ճանապարհով լուծելու համար։
«Այսօր մենք հետևում ենք Ադրբեջանի ու Հայաստանի սահմանին սրված իրավիճակին։ Երկու պետությունն էլ մեզ համար եղբայրական են։ Սակայն այնտեղ տեղի ունեցող ողբերգական իրադարձությունները վերաբերում են ոչ միայն Ռուսաստանին, դրանք ցավալի են ամբողջ Կովկասի ու ԱՊՀ երկրների համար։ Կոչ եմ անում Հայաստանի, Ադրբեջանի ու դաշնային բոլոր պետությունների ղեկավարներին ելույթ ունենալ ու միջոցներ կիրառել՝ այդ հակամարտությունը դադարեցնելու համար»,- գրել է Կադիրովը։
Նրա խոսքով՝ պետք է անել ամեն ինչ, որ կողմերն ընդառաջ գնան միմյանց ու խաղաղության հասնեն։ Հակառակ դեպքում, եթե հակամարտությունը լայնամասշտաբ պատերազմի վերածվի, կարող է մեծ ողբերգական հետևանքներ ունենալ ոչ միայն Կովկասի համար։
«Մենք հիշում ենք Ղարաբաղի իրադարձությունները, թե որքան մարդկային կորուստներ եղան այդ պատերազմում․․․ Հայաստանի ու Ադրբեջանի սահմանին սրված հակամարտության մասնակիցները պետք է իմանան, որ եթե շտապ վճռական միջոցներ չկիրառվեն, իրավիճակը կարող է վերածվել բաց մեծ պատերազմի՝ դրանից բխող բոլոր հետևանքներով։ Նոր սադրանքներ կսկսվեն, մահացածների անվերջ հոսքեր կլինեն, անթիվ-անհամար վիրավորներ կլինեն, փախստականներ, որբեր․․․ Բայց հաղթողներ չեն լինի», - կարծում է Կադիրովը։
Հանրապետության ղեկավարը պատրաստ է հանուն խաղաղության նույնիսկ ծնկի գալ։
«Այո, ես պատրաստ եմ, եթե պետք է, զենք վերցնել ու պայքարել արդարության, խաղաղության համար։ Սակայն ավելի խելամիտ կլինի, եթե բանակցությունների սեղան նստենք ու թույլ չտանք, որ մասշտաբային պատերազմ լինի», - գրել է նա։
Եվրոպական օմբուդսմանի ինստիտուտին մտահոգել է ԱԷԿ–ի հետ կապված Ադրբեջանի հայտարարությունը
Հիշեցնենք, որ հուլիսի 12–ից իրավիճակը սրվել է հայ–ադրբեջանական սահմանի Տավուշի հատվածում։ Հուլիսի 12–ին` ժամը 12:30-ի սահմաններում, Ադրբեջանի զինված ուժերի զինծառայողները ՈւԱԶ մակնիշի ավտոմեքենայով Տավուշի ուղղությամբ ՀՀ պետական սահմանը խախտելու փորձեր են արել: Հայկական կողմի նախազգուշացումից հետո Ադրբեջանի զինծառայողները, թողնելով ավտոմեքենան, վերադարձել են իրենց դիրքեր:
Դրանից հետո հակառակորդը պարբերաբար վերսկսում է գնդակոծությունն ինչպես հայ դիրքապահների, այնպես էլ բնակավայրերի ուղղությամբ։
Հուլիսի 18-ի պաշտոնական տվյալներով՝ Ադրբեջանն ունի 13 զոհ, վիրավորների մասին որևէ բան չի հաղորդվում, իսկ հայկական կողմը 4 զոհ ունի, 36 վիրավոր (ևս մեկը խաղաղ բնակչությունից)։
Արցախում լուսադեմին ադրբեջանական ORBITER-3 տիպի անօդաչու թռչող սարք են խոցել. լուսանկարներ
