ԵՐԵՎԱՆ, 17 հուլիսի - Sputnik. Սահմանագծում ամբողջ օրը համեմատաբար հանգիստ է եղել, կրակոցները քիչ են եղել, միայն հրաձգային զենքերից։ Իջևանում կայացած մամուլի ասուլիսի ժամանակ նման հայտարարություն արեց ՀՀ պաշտպանության նախարարության ներկայացուցիչ Արծրուն Հովհաննիսյանը։
Նա հավելեց, որ այսօր եղել է զորամասերից մեկում, զորքերի և հրամանատարության մարտական ոգին բարձր է, լիովին տիրապետում են իրավիճակին, տեսնում են հակառակորդի բոլոր շարժերն ու ցանկությունները։ Ցանկացած սադրանք արժանի հակահարված կստանա։
Նա չբացառեց, որ այս հարաբերական հանգիստը կարող է լինել պարզապես հնարք ադրբեջանցիների համար մեր զգոնությունը բթացնելու և նույնիսկ այլ հատվածում հարված հասցնելու համար։ Նա կրկնեց՝ հակառակորդի ցանկացած ոտնձգություն ճնշվելու է։
«Զորակոչն ու զորացրումն իրականացվում են բնականոն, ոչ մի հետաձգում չկա ու չի էլ լինելու»,- հայտարարեց Հովհաննիսյանը։
Հիշեցնենք, որ հուլիսի 12–ից իրավիճակը սրվել է հայ–ադրբեջանական սահմանի Տավուշի հատվածում։ Հուլիսի 12–ին` ժամը 12:30-ի սահմաններում, Ադրբեջանի զինված ուժերի զինծառայողները ՈւԱԶ մակնիշի ավտոմեքենայով Տավուշի ուղղությամբ ՀՀ պետական սահմանը խախտելու փորձեր են արել: Հայկական կողմի նախազգուշացումից հետո Ադրբեջանի զինծառայողները, թողնելով ավտոմեքենան, վերադարձել են իրենց դիրքեր:
Դրանից հետո հակառակորդը պարբերաբար վերսկսում է գնդակոծությունն ինչպես հայ դիրքապահների, այնպես էլ բնակավայրերի ուղղությամբ։
Վնասվածք ստացած և բերման ենթարկված ադրբեջանցիներ․ Լեհաստանում հայերի ցույցը թեժ է անցել
Հուլիսի 16–ին հայկական ստորաբաժանումները կանխել են հակառակորդի դիվերսիոն ներթափանցման փորձը։ Թեժ մարտից հետո հակառակորդը, կորուստներ կրելով, հետ է շպրտվել։ Այնուհետև ադրբեջանական ստորաբաժանումները սկսել են հրետակոծել Այգեպար և Մովսես գյուղերը՝ կիրառելով ականանետ և Դ-30 հաուբից:
Հուլիսի 17-ի պաշտոնական տվյալներով՝ Ադրբեջանն ունի 13 զոհ, իսկ հայկական կողմը` 4 զոհ, 36 վիրավոր և ևս մեկը խաղաղ բնակչությունից։
