ԵՐԵՎԱՆ, 17 հուլիսի – Sputnik. ՀՀ վարչապետ Նիկոլ Փաշինյանն այսօր Մինսկում Եվրասիական միջկառավարական խորհրդի նիստից հետո հանդիպել է Բելառուսի նախագահ Ալեքսանդր Լուկաշենկոյի հետ։
«Գիտեմ, որ լարված օր եք ունեցել, քանի որ ստիպված եք երկու ճակատում կռվել և՛ որպես վարչապետ, և՛ նախագահի փոխարեն»,– ՀՀ կառավարության ղեկավարին ընդունելիս կատակել է Լուկաշենկոն։
Բելառուսի նախագահն իրենց հանդիպումն անվանել է երկկողմ համագործակցության խորացմանն ու ԵԱՏՄ շրջանակում փոխգործակցությանն ուղղված ևս մեկ քայլ։
«Ե՛վ մենք, և՛ դուք ԵԱՏՄ–ում նույն խնդիրներն ունենք։ Մենք գրեթե միանման տնտեսություն ունենք, մենք հենվում ենք տնտեսության իրական հատվածի վրա և ածխաջրածինների մեծ պաշարներ չունենք, ինչպես մեր որոշ գործընկերները», – նշել է Լուկաշենկոն։
Ըստ նրա` և՛ Ղազախստանը, և՛ Ռուսաստանը մեծ հնարավորություններ ունեն, ինչը չունեն Հայաստանն ու Բելառուսը։ Լուկաշենկոն բողոքել է ԵԱՏՄ ներսում առկա մեծաթիվ արգելքներից ու բացառություններից։ Նա հույս է հայտնել, որ վարչապետների հանդիպումը թույլ կտա լուծել բազմաթիվ խնդիրները։ Այնուհետև Բելառուսի նախագահը խնդրել է Փաշինյանին պատմել նիստի որոշ արդյունքների մասին։
«ԵԱՏՄ-ն ապացուցեց իր կենսունակությունը»․ Փաշինյանը շնորհակալություն հայտնեց գործընկերներին
Ի պատասխան Փաշինյանն ասել է, որ նիստը բավական արդյունավետ է եղել։ Խոչընդոտների վերացման առումով լավ արդյունքներ են գրանցվել։ Նա բերել է Հայաստանի օրինակը` նշելով, որ կառավարությունն արդեն երկու խոչընդոտ է վերացրել։ Համապատասխան որոշումներից մեկն արդեն ուժի մեջ է մտել, երկրորդն ընդունված է և առաջիկայում նույնպես կսկսի գործել։
Վարչապետի խոսքով` այսօրվա նիստում քննարկվել է նաև պետական մրցույթներին ԵԱՏՄ երկրների ձեռնարկությունների փոխադարձ մասնակցության հարցը։ Նա համոզված է, որ հարցը տեսանելի ապագայում ևս լուծում կստանա։ Ըստ Փաշինյանի` քաղաքական կամքի առկայության պարագայում հնարավոր է կարգավորել բոլոր խնդիրները։ Պարզապես հետևողական աշխատանք է հարկավոր։
ԵԱՏՄ երկրների վարչապետների հաջորդ հանդիպումը կկայանա հոկտեմբերին Երևանում. Փաշինյան
