ԵՐԵՎԱՆ, 17 հուլիսի - Sputnik. Վերջին օրերին հայ-ադրբեջանական սահմանում տեղի ունեցող իրադարձությունները Հայաստանի շուրջն են համախմբել աշխարհասփյուռ հայությանը։ Այս կարծիքին է հայտնի գործարար, բարերար, «Տաշիր» ընկերության հիմնադիր Սամվել Կարապետյանի դուստրը` բիզնեսլեդի Տաթևիկ Կարապետյանը։ Նա Instagram-ի իր էջում հուզիչ գրառում է կատարել՝ ընդգծելով իր սերը հայրենիքի հանդեպ։
«Ինչ է իսկական սերը հայրենիքի հանդեպ։ Դա սեր է այն երկրի հանդեպ, որտեղ ծնվել ես, այն վայրի հանդեպ, որտեղ ապրում են քո մտերիմներն ու հարազատները, դա սեր է նախնիներիդ հողի հանդեպ։ Յուրաքանչյուրի համար այն տարբեր է, բայց մի բան միանշանակ է. այդ զգացումն առանձնահատուկ տեղ է զբաղեցնում մարդու սրտում։ Եվ այն սկսում է ցավել հայրենի հողին սպառնացող փոքրագույն վտանգի դեպքում։ Այս օրերին սիրտս լցված է տագնապով, թե ինչ է կատարվում իմ հայրենիքի սահմաններում ՝ իմ Հայաստանում»,- գրել է նա։
Տաթևիկն ընդգծել է, որ սահմանին ստեղծված իրավիճակը միջազգային ամբողջ հանրության ուշադրությունն է պահանջում։ Նա հույս է հայտնել, որ համապատասխան արձագանքը կլինի անհապաղ ՝ նշելով, որ անհրաժեշտ է կանխել հակամարտության հետագա սրման հնարավորությունը՝ պատերազմից խուսափելու համար:
Ցանկացած վտանգ, որ առաջանում է Հայաստանի, նրա ժողովրդի և նրա խաղաղ կյանքի համար, անթույլատրելի է։
«Իմ հզոր ժողովուրդը, որն իր պատմության ընթացքում վերապրել է բազմաթիվ ողբերգություններ, եղել ոչնչացման եզրին, ողջ է մնացել։ Ողջ է մնացել արժանապատիվ ՝ պահպանելով իր լեզուն, մշակույթը, կրոնը, իր պետությունը, պահպանելով մեծ սերը հայրենիքի և հարուստ ժառանգության հանդեպ։ Հետևաբար, մենք բոլորից լավ ենք հասկանում ազատության ու կյանքի գինը։ Եվ, իհարկե, մենք այլևս երբեք թույլ չենք տա բռնության և ագրեսիայի կրկնությունը, և մեր հայրենիքը պաշտպանելու ենք բոլոր միջոցներով», - շարունակել է Տաթևիկ Կարապետյանը։
«Հայերի հետ ուժի լեզվով խոսել հնարավոր չէ». Կանդելակիի և հայտնի հայերի կոչն Ադրբեջանին
Վերջին օրերի իրադարձությունները Հայաստանի շուրջ համախմբեցին աշխարհասփյուռ հայությանը։ Նա վստահ է՝ սփյուռքն ամուր հենարան կլինի հայ ժողովրդի համար և կանի ամեն ինչ, որպեսզի ապահովի խաղաղ երկինք խաղաղ մարդկանց համար հայրենի հողում։
Հիշեցնենք, որ հուլիսի 12–ից իրավիճակը սրվել է հայ–ադրբեջանական սահմանի Տավուշի հատվածում։ Հուլիսի 12–ին` ժամը 12:30-ի սահմաններում, Ադրբեջանի զինված ուժերի զինծառայողները ՈւԱԶ մակնիշի ավտոմեքենայով Տավուշի ուղղությամբ ՀՀ պետական սահմանը խախտելու փորձեր են արել: Հայկական կողմի նախազգուշացումից հետո Ադրբեջանի զինծառայողները, թողնելով ավտոմեքենան, վերադարձել են իրենց դիրքեր:
Դրանից հետո հակառակորդը պարբերաբար վերսկսում է գնդակոծությունն ինչպես հայ դիրքապահների, այնպես էլ բնակավայրերի ուղղությամբ։
«Բանակը քանակով չի որոշվում». Արթուր Ալեքսանյանի` զինծառայողներին գոտեպնդող գրառումը https://armeniasputnik.am/society/20200717/23780824.html
Հուլիսի 16–ին հայկական ստորաբաժանումները կանխել են հակառակորդի դիվերսիոն ներթափանցման փորձը։ Թեժ մարտից հետո հակառակորդը, կորուստներ կրելով, հետ է շպրտվել։ Այնուհետև ադրբեջանական ստորաբաժանումները սկսել են հրետակոծել Այգեպար և Մովսես գյուղերը՝ կիրառելով ականանետ և Դ-30 հաուբից:
Հուլիսի 17-ի պաշտոնական տվյալներով՝ Ադրբեջանն ունի 13 զոհ, իսկ հայկական կողմը` 4 զոհ, 36 վիրավոր և ևս մեկը խաղաղ բնակչությունից։
