ԵՐԵՎԱՆ, 17 հուլիսի – Sputnik. Վերջին երեք ամիսներին «Արաբկիր» բժշկական համալիրում ախտորոշվել և բուժվել է կավասակի և կավասակիանման հիվանդությամբ 8 երեխա։ Տվյալները ներկայացված են ԲԿ–ի ֆեյսբուքյան էջում, որտեղ նաև կորոնավիրուսով վարակված երեխաներին առնչվող վիճակագրություն կա։
«Կավասակի և կավասակիանման հիվանդությամբ 8 երեխայից 5-ի մոտ բորբոքային համախտանիշն ասոցացված է եղել կորոնավիրուսի հետ: 8 երեխայից 7-ը ստացել են ներերակային իմունոգլոբուլին, իսկ 1-ի մոտ դիտվել է ինքնալավացում, և նա իմունոգլոբուլին չի ստացել»,–նշված է հաղորդագրության մեջ։
ԲՀ–ն կորոնավիրուսով վարակված առաջին երեխային ընդունել է մարտի 31-ին: Դրանից հետո անցած երեք ամիսների ընթացքում «Արաբկիր» է դիմել տարբեր ախտանշաններով 4527 երեխա։ Անհետաձգելի բուժօգնության կարիք ունեցող կորոնավիրուսի կասկածելի ախտանշաններով 621 երեխա հոսպիտալացվել է ժամանակավոր մեկուսացման բաժանմունքում, իսկ 181 երեխա` միջին և ծանր կլինիկական ընթացքով` թոքաբանական իզոլացված-COVID բաժանմունքում:
ԲՀ–ն հայտնում է, որ բոլոր երեխաները դուրս են գրվել առողջացումով:
«Արաբկիր» ԲՀ-ն այս ընթացքում գործունեություն է ծավալել նաև Երևանի 2 մանկատներում` «Մարի Իզմիրլյանի անվան» և Նորքի «Մանկան տուն». մանկատների բոլոր երեխաները նույնպես ապաքինվել են:
Հիշեցնենք` մեկ ամիս առաջ` հունիսի 5-ին, ՀՀ առողջապահության նախարարությունից Sputnik Արմենիային հայտնել էին, որ ՀՀ–ում Covid 19-ով վարակված ավելի քան 1000 երեխա կա։ Այդ օրերին էլ հայտնի դարձավ, որ Հայաստանում արդեն իսկ Կավասակիի համախտանիշով երկու երեխա կա` 4 և 9 տարեկան։
Հուլիսի 17-ի տվյալներով` Հայաստանում կորոնավիրուսով վարակվածների թիվը հասել է 34 001–ի։
