ԵՐԵՎԱՆ, 16 հուլիսի – Sputnik. Հայաստանը համապատասխան միջոցներ է ձեռնարկում Նարեկ Սարդարյանին ՀՀ վերադարձնելու ուղղությամբ։ Տեղեկությունը հայտնում է ՀՀ ազգային անվտանգության ծառայությունը։
2020 թ. հուլիսի 8-ին` ժամը 11:00-12:00-ի սահմաններում, ԱՀ Նախիջևանի Ինքնավար Հանրապետության հետ սահմանակից ՀՀ Սյունիքի մարզի Գորայք համայնքի վարչական տարածքի արոտավայրերում սեփական անասուններն արածացնելիս անհետ կորել է Սյունիքի մարզի Ներքին Խնձորեսկ գյուղի բնակիչ, 1990 թ. ծնված, ՀՀ քաղաքացի Նարեկ Սարդարյանը: Պարզվել է, որ Ն.Սարդարյանը կորած անասունները որոնելու արդյունքում մոլորվել և անցել է ԱՀ Նախիջևանի տարածք, որտեղ գերեվարվել է:
Սարդարյանը բնութագրվում է որպես հայրենասեր, հանգիստ և աշխատասեր անձնավորություն, տեղական ինքնակառավարման և իրավապահ մարմինների հետ երբևիցե խնդիրներ չի ունեցել: Նա ունի ընտանիք և անչափահաս երեխաներ, որոնց հոգսերը հոգում է ինքը:
Ներքին Խնձորեսկի ղեկավար Երվանդ Մալունցն ավելի վաղ Sputnik Արմենիայի հետ զրույցում ասել էր, որ տեղանքը նորություն չէ Նարեկի համար։
Երեկ ադրբեջանական լրատվամիջոցները մի տեսանյութ տարածեցին, որում տղամարդը խնդրում էր Ադրբեջանի քաղաքացիություն տալ իրեն կամ ուղարկել երրորդ երկիր։
Տղամարդն ասում էր, որ իր անունը Նարեկ Սարդարյան է և ինքը Սյունիքի մարզի Ներքին Խնձորեսկի բնակիչ է։
