ԵՐԵՎԱՆ, 16 հուլիսի - Sputnik. ՀՀ պաշտպանության նախարարության ներկայացուցիչ Արծրուն Հովհաննիսյանը Տավուշի մարզում կայացած ամփոփիչ ճեպազրույցի ժամանակ հայտնեց, որ այս գիշեր ՀՀ Զինված ուժերը ոչնչացրել են ադրբեջանական հատուկ նշանակության էլիտար «Յաշմա» 100-հոգանոց խմբի մինչև 40%-ը։
«Մենք ֆոտոապացույցներով այս պահին ունենք 10 դիակ դուրս բերելու ապացույց։ Նաև կան այլ տեղանքներ, որտեղից դիակները հանված չեն, նաև շատ զոհեր կարող էին իրենց հետ տանել անհաջողության մատնված, բայց չզոհված զինծառայողները։ Հետո բոլորը չէ, որ միանգամից զոհվում են, հաճախ լինում են վիրավորներ, որոնք հետ քաշվելուց հետո են մահանում։ Չեմ ուզի` տպավորություն ստեղծվի, թե այդ 100-ն էլ գլխովին ջախջախվել են, բայց ստացվում է, որ զգալի թվով կորուստ է կրել մոտավորապես 100–հոգանոց խումբը։ Դա կարող է լինել մինչև 25, 30 կամ 40%», - ասաց Հովհաննիսյանը։
Նրա խոսքով՝ «Յաշման» Ադրբեջանի հատուկ նշանակության էլիտար խումբ է, որի կիրառումը ցույց է տալիս, որ ադրբեջանական սահմանային զինակետերը չեն կարողանում կատարել իրենց մարտական խնդիրները։
«Իրենց նախագահի բարձրագոչ հայտարարություններից և երրորդ բանակային կորպուսի անհաջողություններից հետո է «Յաշման» ուղղորդվել սահման», - ասաց ՊՆ ներկայացուցիչը։
Հուլիսի 12–ից իրավիճակը սրվել է հայ–ադրբեջանական սահմանի Տավուշի հատվածում։ Հուլիսի 12–ին ժամը 12:30-ի սահմաններում, Ադրբեջանի զինված ուժերի զինծառայողները ՈւԱԶ մակնիշի ավտոմեքենայով Տավուշի ուղղությամբ ՀՀ պետական սահմանը խախտելու փորձեր են արել: Հայկական կողմի նախազգուշացումից հետո Ադրբեջանի զինծառայողները, թողնելով ավտոմեքենան, վերադարձել են իրենց դիրքեր:
Դրանից հետո հակառակորդը պարբերաբար վերսկսում է գնդակոծությունն ինչպես հայ դիրքապահների, այնպես էլ բնակավայրերի ուղղությամբ։
ՊՆ–ն հրապարակել է ադրբեջանցիների դիակների տարհանման լուսանկարներն ու տեսանյութը
Հուլիսի 16-ին, 05:20-ից սկսած Տավուշի Այգեպար, Մովսես և Չինարի գյուղերը հերթական անգամ հրետակոծվել են Ադրբեջանական զինուժի կողմից։ Հրետակոծությունների հետևանքով վնասվել է Այգեպարի մանկապարտեզը, Չինարիում երեք բնակելի տուն, վիրավորվել է Չինարիի բնակիչ 48-ամյա Արամայիս Հովակիմյանը։
Հուլիսի 16-ի պաշտոնական տվյալներով՝ Ադրբեջանն ունի 13 (12 զինվորական, այդ թվում՝ գեներալ֊մայոր Փոլադ Հաշիմովը և 1 խաղաղ բնակիչ), իսկ հայկական կողմը` 4 զոհ՝ մայոր Գարուշ Համբարձումյանը, կապիտան Սոս Էլբակյանը, կրտսեր սերժանտներ Գրիշա Մաթևոսյանն ու Սմբատ Գաբրիելյանը։
ՀՀ ՊՆ–ն զգուշացնում է` ադրբեջանական դիակների թիվը կարող է խիստ ավելանալ
