ԵՐԵՎԱՆ, 16 հուլիսի - Sputnik. Թեև ՀՀ ՊՆ-ն հայտարարել է անցած գիշեր Տավուշի մարզի հայաստանյան սահմանապահ դիրքերի նկատմամբ Ադրբեջանի ԶՈՒ-ի իրականացրած ներթափանցման երկու փորձերի մասին, բայց իրականում դրանք ավելին են եղել: Այս մասին այսօր Տավուշի մարզում կայացած ճեպազրույցում լրագրողներին հայտնեց ՀՀ ՊՆ ներկայացուցիչ Արծրուն Հովհաննիսյանը:
«Չէի ցանկանա նշել, երկու դեպք, քանի որ շատ դեպքերում գործողություններն ընթանում են համակարգված խառը մարտավարությամբ: Այսինքն՝ հրթիռահրետանային ու ԱԹՍ-ների հասցրած հարվածներին զուգահեռ ընթացել են նաև այլ բնույթի հարձակվողական գործողություններ: Այս երկուսն ամենացայտուն դեպքերն են, որոնք մենք անվանում ենք դիվերսիոն գործողություններ, բայց, եթե անկեղծ ասենք, իրենք իրենց ծավալով ավելին են, քան դիվերսիոն գործողությունը: Դա դասական մարտավարական հարձակում է»,- ասաց Հովհաննիսյանը:
ՊՆ ներկայացուցիչը նաև մեկնաբանեց, որ եթե այդ գործողությանը մասնակցել է շուրջ 100 ադրբեջանական զինվորական, ապա դա հավասարազոր է մեկ վաշտի կատարած գործողության:
«Ընդ որում, եթե հաշվի առնենք, որ դրանք հատուկ նշանակության ստորաբաժանումներ են, բնականաբար, պատրաստվածությունն ու սպառազինությունը շատ ավելի մեծ է: Վստահ եմ նաև, որ դասական վաշտի կանոններով, 100 հոգուն չի աջակցել, ասենք, մեկ հրետանային մարտկոց: Բնականաբար, մի քանի դիվիզիոն է աջակցել, իսկ դա նշանակում է, որ հարձակման ծավալներն ավելի մեծ են, քան դասական մարտավարական կանոնագրքերում»,- նշեց Հովհաննիսյանը:
Տավուշի մարզի ավերված տների բնակիչների համար պետությունը նոր տներ կկառուցի
Հիշեցնենք, որ հուլիսի 12–ից իրավիճակը սրվել է հայ–ադրբեջանական սահմանի Տավուշի հատվածում։ Հուլիսի 12–ին` ժամը 12:30-ի սահմաններում, Ադրբեջանի զինված ուժերի զինծառայողները ՈւԱԶ մակնիշի ավտոմեքենայով Տավուշի ուղղությամբ ՀՀ պետական սահմանը խախտելու փորձեր են արել: Հայկական կողմի նախազգուշացումից հետո Ադրբեջանի զինծառայողները, թողնելով ավտոմեքենան, վերադարձել են իրենց դիրքեր:
Դրանից հետո հակառակորդը պարբերաբար վերսկսում է գնդակոծությունն ինչպես հայ դիրքապահների, այնպես էլ բնակավայրերի ուղղությամբ։
Հուլիսի 15-ի պաշտոնական տվյալներով՝ Ադրբեջանն ունի 11 զոհ, իսկ հայկական կողմը` 4 զոհ, 10 վիրավոր։
Հուլիսի 16–ի առավոտյան ՊՆ–ն հայտնեց, որ գիշերը՝ ժամը 03:40-ի սահմանում, ՀՀ ԶՈւ դիրքապահները հակառակորդի շարժ են նկատել։ Անցնելով շրջանաձև պաշտպանության՝ հայկական ստորաբաժանումները կանխել են հակառակորդի դիվերսիոն ներթափանցման փորձը։ Թեժ մարտից հետո հակառակորդը, կորուստներ կրելով, հետ է շպրտվել։ Այնուհետև ադրբեջանական ստորաբաժանումները ժամը 05:20-ին սկսել են հրետակոծել Այգեպար և Մովսես գյուղերը՝ կիրառելով ականանետ և Դ-30 հաուբից:
Պաշտպանության նախարար Դավիթ Տոնոյանը կապ է հաստատել ԵԱՀԿ գործող նախագահի անձնական ներկայացուցիչ, դեսպան Անջեյ Կասպրշչիկի հետ։ Նա ներկայացրել է ժամը 03:40-ից ՀՀ պետական սահմանին ստեղծված իրավիճակը, նշել, որ ադրբեջանական կողմն ունի բազմաթիվ վիրավորներ և զոհեր։
