ԵՐԵՎԱՆ, 14 հուլիսի – Sputnik. Հակառակորդի կրակոցների հետևանքով այսօր զոհված ժամկետային զինծառայող, կրտսեր սերժանտ Սմբատ Գևորգի Գաբրիելյանը Գեղարքունիքի մարզի Ճամբարակ համայնքից էր։ Sputnik Արմենիայի հետ զրույցում համայնքի ղեկավարը՝ Վազգեն Ադամյանը, հայտնեց, որ Սմբատը հաջորդ տարվա հունվարի 15-ին պետք է զորացրվեր։
«Սմբատը 1․5 տարվա զինծառայող էր։ Նրա եղբայրն ու հայրն էլ զինվորական են։ Նրանց տունը զորամասի մոտ է, և տարիներ առաջ Սմբատի մյուս՝ 6-7-րդ դասարանի եղբայրը, զորամասի հետ կապված ինչ-որ դժբախտ պատահարի զոհ է դարձել»,-ասաց Ադամյանը։
Համայնքի ղեկավարը հայտնեց նաև, որ մինչև բանակ գնալը, Սմբատը համալսարան է ընդունվել՝ կրթություն ստանալու ցանկություն է ունեցել։
Սմբատի մայրն ուսուցչուհի է և համայնքի ղեկավարին նույնպես դաս է տվել։
Պաշտպանության նախարարությունը քիչ առաջ հայտնել էր, որ հակառակորդի կրակոցների հետևանքով զոհվել են ժամկետային զինծառայողներ, կրտսեր սերժանտ Սմբատ Գևորգի Գաբրիելյանը և կրտսեր սերժանտ Գրիշա Վահանի Մաթևոսյանը։
Ավելի վաղ հայտնել էինք, որ հակառակորդի կրակոցների զոհ են դարձել ևս 2 զինծառայող՝ մայոր Գարուշ Վեմիրի Համբարձումյանը և կապիտան Սոս Փայլակի Էլբակյանը։
«Ուշքն ու միտքը ծառայությունն էր»․ մանրամասներ զոհված զինծառայողների մասին
Հիշեցնենք, որ հուլիսի 12–ին, ժամը 12:30-ի սահմաններում Ադրբեջանի զինված ուժերի զինծառայողները ՈւԱԶ մակնիշի ավտոմեքենայով Տավուշի ուղղությամբ ՀՀ պետական սահմանը խախտելու փորձեր են կատարել: Հայկական կողմի նախազգուշացումից հետո Ադրբեջանի զինծառայողները, թողնելով ավտոմեքենան, վերադարձել են իրենց դիրքեր: Ժամը 13:45-ին Ադրբեջանի զինված ուժերի զինծառայողները կրկնել են հայկական զինված ուժերի սահմանային դիրքը գրավելու փորձը` կիրառելով հրետանային կրակ, սակայն ճնշվել են հայկական կողմից և, կորուստներ տալով, հետ շպրտվել:
Դրանից հետո՝ ինչպես երեկ, այնպես էլ այսօր Ադրբեջանի ԶՈւ-ն շարունակում է կրակահերթ իրականացնել հայ դիրքապահների և բնակավայրերի ուղղությամբ։
Պաշտոնական տվյալներով՝ Ադրբեջանն ունի 11 զոհ, իսկ հայկական կողմը 4 զոհ և 5 վիրավոր։
