ԵՐԵՎԱՆ, 10 հուլիսի - Sputnik. ՀՀ արտակարգ իրավիճակների նախարարությունը հուլիսի 10-ին, ժամը 18։40-ին ահազանգ է ստացել, որ «Աջարաբեթ» բուքմեյքերական ընկերության գլխավոր գրասենյակում ռումբ է տեղադրված։ Տեղեկությունը հայտնում է ՀՀ ԱԻՆ մամուլի ծառայությունը։
Դեպքի վայր են մեկնել հրշեջ-փրկարարական ջոկատից մեկ մարտական հաշվարկ, քաղաքացիական պաշտպանության վարչության քաղաքացիական պաշտպանության ուժերի հավաքական կենտրոնի ինժեներասակրավորական խումբը, փրկարարական ուժերի վարչության հատուկ նշանակության փրկարարական աշխատանքների իրականացման կենտրոնի կինոլոգիական խումբը, ճգնաժամային կառավարման ազգային կենտրոնի օպերատիվ խումբը և հոգեբանական աջակցության բաժնի հոգեբանական խորհրդատվության գծով կրտսեր հրահանգիչը:
Ավելի ուշ` ժամը 21։30–ին, ԱԻՆ–ը հաղորդագրություն տարածեց, որ «Աջարաբեթի» գրասենյակի տեղազննման արդյունքում պայթուցիկ սարք չի հայտնաբերվել։ Ահազանգը կրկին կեղծ էր։
Հիշեցնենք՝ օրեր առաջ ԱԻՆ–ն ահազանգ էր ստացել, թե ռումբ է տեղադրված «Երևան մոլ» առևտրի և զվարճանքի կենտրոնի «Ֆուդկորտում»։
«Դալմա Գարդեն մոլից» մարդկանց տարհանում են. ԱԻՆ-ը ռումբի մասին ահազանգ ունի
Մարդկանց տարհանեցին, սակայն մասնագետները տեղազննման արդյունքում առևտրի կենտրոնի տարածքում պայթուցիկ սարք չհայտնաբերեցին։
Հուլիսի 6-ին մեկը մյուսի հետևից ահազանգեր հնչեցին, թե ռումբեր են տեղադրված «Դալմա Գարդեն մոլ» և «Մեգամոլ Արմենիա» առևտրի կենտրոններում։
Դեպքի վայր մեկնած փրկարարներն ու ոստիկանները 350 քաղաքացու տարհանեցին «Մեգամոլ Արմենիայից» և շուրջ 500 քաղաքացու` «Դալմա Գարդեն մոլից», սակայն պարզվեց` ահազանգերը կրկին կեղծ էին. տեղազննման արդյունքում առևտրի կենտրոններից ոչ մեկում ռումբ չհայտնաբերվեց։
ԱԻՆ-ը տեղեկություն է ստացել, որ առևտրի կենտրոնում ռումբեր են տեղադրված
Հուլիսի 7-ին ահազանգ էր ստացվել, որ «Մերիդիան» էքսպոկենտրոնի մոտակայքում նռնակ ու փամփուշտներ են հայտնաբերվել։
Վերջինը կեղծ չէր։
