Ջիգարխանյանի քույրը «խլել» է Կոնչալովսկու ապագա կնոջ ընկերոջը․ Արինբասարովան անկեղծացել է

ԵՐԵՎԱՆ, 8 հուլիսի – Sputnik. Բալետի նախկին պարուհի, դերասանուհի Նատալյա Արինբասարովան՝ ռեժիսոր Անդրեյ Կոնչալովսկու նախկին կինը, «Вместе» հոգեբանական նախագծի շրջանակում հիշել է ընկերուհուն՝ Արմեն Ջիգարխանյանի ազգականուհի Գայանե Ջիգարխանյանին։

«Բալետի դպրոցում միասին էինք սովորում։ Ես նրան պաշտում էի, պարզապես սիրահարված էի նրան։ Այնքան կարդացած էր, խելացի։ Եվ բոլոր տղաները նրան էին սիրահարվում, անգամ իմ երկրպագուն դավաճանեց ինձ ու սիրահարվեց Գայանեին»,-պատմել է Արինբասարովան` խոստովանելով, որ թեև դա իր համար հարված է եղել, բայց Գայանեի հանդեպ երբեք թշնամանք չի զգացել։

Դերասանուհու խոսքով` Գայանեն միշտ շատ անկաշկանդ էր, և ինքն էլ ուզում էր այդպիսին լինել։ Հենց Ջիգարխանյանի ազգականի պատճառով է դերասանուհին սկսել ծխել 17 տարեկանում։

«Մի անգամ նա պայուսակից բարակ գլանակ հանեց՝ ոսկեգույն ֆիլտրով, և սկսեց ծխել։ Քիչ էր մնում` ընկնեի տանիքից։ Ասում եմ․ «Գայանե, ի՞նչ ես անում, ախր չի կարելի ծխել»։ Իսկ նա․ «Դա իմ անձնական գործն է»։ Ես չհամարձակվեցի փորձել, բայց հաջորդ օրը մտա հանդերձարան և ասացի․ «Աղջիկներ, ես ուզում ծխել սովորել»։ Սկզբում չէր ստացվում, հետո վերջապես ներս քաշեցի ծուխը․․․ և ընկա»,-ծիծաղելով պատմել է դերասանուհին։

Նատալյան և Գայանեն լավ ընկերուհիներ են եղել։ Հենց Գայանեի շնորհիվ է Արինբասարովան կարողացել չհուսահատվել, երբ իմացել է, որ այլևս չի կարողանա բալետով զբաղվել․ նրա մոտ սրտի արատ էին հայտնաբերել։ Պարուհին, որը երազում էր ելույթ ունենալ մեծագույն բեմերում, ստիպված էր փոխել մասնագիտությունը և դերասանուհի դառնալ։

«Մի անգամ Գայանեն ինձ այսպիսի բան ասաց․ «Եթե քո ու նպատակիդ արանքում ծովեր են փոթորկում, կհամարձակվե՞ս ուղուցդ շեղվել»։ Եվ այս արտահայտությունը իմ կյանքի նշանաբանը դարձավ»,-ասում է Արինբասարովան։

Նույն տարում, երբ Նատալյա Արինբասարովան 17 տարեկան էր, հանդիպեց ապագա ամուսնուն՝ Անդրեյ Կոնչալովսկուն, որը բալետի պարուհի էր փնտրում իր «Առաջին ուսուցիչը» ֆիլմի համար։ Նատալյան ռեժիսորին դուր եկավ, ու այդպես սկսվեց նրա դերասանական կարիերան ու ռեժիսորի հետ կապը։

«Թույլ չտվեցին ասել ճշմարտությունը»․ Ջիգարխանյանի նախկին կինը խոստացել է պատմել ամեն ինչ

Կոնչալովսկու հետ 4 տարի ապրեցին, բաժանվեցին 1969թ․-ին։ Բայց հիմա 73-ամյա դերասանուհին գոհ է իր ճակատագրից։

«Ես գիտեմ, թե ինչ է նշանակում մեծ սերը, փառքն ու համաշխարհային հաջողությունը։ Յուրաքանչյուրն էլ տաղանդավոր է, պարզապես պետք է լսես ինքդ քեզ, փորձես պարզել, թե ինչով ես ուզում զբաղվել և գնաս դեպի նպատակակետ»,-վստահեցրել է Արինբասարովան։

«Նրա պահվածքը զզվեցրել է». Արմեն Ջիգարխանյանի որդին քննադատել է հոր նախկին կնոջը

Նատալյա Արինբասարովան խորհրդային և ՌԴ թատրոնի ու կինոյի դերասանուհի է, նրա երակներով կովկասցու և լեհի արյուն է հոսում։

«Չպիտի նրա կենցաղը փոխեին». Ջիգարխանյանի նախկին կինը մեղադրում է դերասանի հարազատներին