Խոսքի ազատության պաշտպանության կոմիտեի նախագահ Աշոտ Մելիքյանի դիտարկմամբ՝ եթե պահպանվելու է իր դարն ապրած լիցենզավորման կարգը, եթե չի փոխվելու մրցույթների բարդ ընթացակարգը, եթե չի լուծվելու մարզերում գործող տեղական հեռուստաընկերությունների հարցը, որոնք դուրս են մնացել թվայնացման գործընթացից ոչ թե իրենց մեղքով, այլ պետության անհեռատես քաղաքականության պատճառով, եթե բարեփոխումներ չեն իրականացվելու նույն հանրային հեռարձակողների գործունեության մեջ, ապա հասկանալի չէ, թե ինչի համար է այս օրենքը և ինչ է այն փոխում:
«Մեծ հաշվով այնպիսի տպավորություն է ստեղծվում, որ ընդամենը բավարարվում են ինչ-որ անձանց քաղաքական ամբիցիաները, որովհետև բարեփոխումներ հեռարձակման ոլորտում այս օրենքի նախագծով դժվար թե հաջողվի իրականացնել»,- Sputnik Արմենիայի հետ զրույցում ասաց նա:
Մելիքյանի և նրա գործընկերների համար անհասկանալի է, թե ինչու օրինագծի հեղինակները չհամաձայնվեցին իրենց հետ և այն չուղարկեցին միջազգային փորձաքննության: Ըստ նրա՝ եթե նախագիծն այդքան լավն էր, ապա ինչու փաստաթուղթը չուղարկեցին Եվրոպայի Խորհուրդ կամ ԵԱՀԿ, որպեսզի այնտեղի փորձագետները տային մասնագիտական կարծիք։ Ըստ Մելիքյանի՝ օրենքի նախագիծը քիչ քննարկված, հում վիճակում է և երկրորդ ընթերցմամբ ընդունելը լավագույն քայլը չէ:
«Կոչ ենք անում նախագիծը հանել շրջանառությունից, տալ միջազգային փորձաքննության և լուրջ քննարկումներ սկսել և՛ հեռուստառադիոընկերությունների ներկայացուցիչների, և՛ լրագրողական կազմակերպությունների, և՛ քաղաքական-հասարակական շրջանակների հետ, թե ինչպիսին պետք է լինի մեր հեռարձակման ոլորտը, ինչ բարեփոխումներ պետք է իրականացվեն և ինչպես ենք հասնելու այդ բարեփոխումներին»,- նշեց Խոսքի ազատության պաշտպանության կոմիտեի նախագահը:
Մելիքյան. «Հեռուստաընկերությունները դեռ դուրս չեն եկել ստվերից և թափանցիկ չեն աշխատում»
Անդրադառնալով հեռուստաընկերությունների լիցենզավորման ժամկետների ավարտին և «Ա1+»-ի խնդրին՝ Մելիքյանն ընդգծեց, որ օրենքի հապճեպ ընդունումը հեղինակները կապում են հենց այն հանգամանքի հետ, որ հեռուստաընկերությունների լիցենզիաների ժամկետներն այս տարի ավարտվում են, հետևաբար պետք է նոր մրցույթներ կազմակերպվեն, սակայն այդ հարցի լուծումը բավականին հեշտ է։ Անհրաժեշտ է ընդամենը մի քանի փոքր փոփոխություն անել «Հեռուստատեսության և ռադիոյի մասին» օրենքում։ Մելիքյանի դիտարկմամբ՝ կարելի է մեկ տարով հետաձգել մրցույթներն ու մեկ տարով երկարաձգել լիցենզավորման ժամկետը, որպեսզի օրենքը լրամշակվի և համապատասխանեցվի ժամանակակից չափանիշներին:
Մելիքյանի համոզմամբ՝ պետք է կայացվի որակյալ օրենք ընդունելու քաղաքական որոշում, այլ ոչ թե ընդունվի հեղհեղուկ մի բան: Նրա խոսքով՝ հեղինակներն արդեն իսկ ասում են, որ պատրաստ են ապագայում փոփոխություններ մտցնել օրենքի մեջ, սակայն հարց է առաջանում, թե ինչու պետք է այսքան թույլ և վատ մշակված օրենք ընդունել ներկա փուլում: Մելիքյանի կարծիքով՝ պետք չէ վատ օրենքը փոխել մեկ ուրիշ վատ օրենքով, հետևաբար՝ հապճեպությունը տեղին չէ:
Տեղին չէր նման օրակարգով ԱԺ լսումներ անցկացնել, քանի որ կոնկրետ փաստաթուղթ չկար. Մելիքյան
Նշենք, որ մի շարք լրագրողական կազմակերպություններ, այդ թվում նաև Խոսքի ազատության պաշտպանության կոմիտեն, հայտարարություն են տարածել՝ կապված հիշյալ օրենքի նախագծի հետ և ներկայացրել իրենց սկզբունքային անհամաձայնությունը որոշ դրույթների ու ձևակերպումների, ընդհանրապես փաստաթուղթն այդ ձևով ընդունելու վերաբերյալ:
