ՀՅԴ Բյուրոյի տնտեսական հետազոտությունների գրասենյակի պատասխանատու Սուրեն Պարսյանի դիտարկմամբ՝ գյուղմթերքի շուկայում նման գնաճ հազվադեպ է եղել վերջին տարիների ընթացքում, սակայն այդ երևույթը կանխատեսելի էր՝ հաշվի առնելով մի քանի հանգամանքներ:
«2016թ.-ից սկսած՝ մեր գյուղատնտեսության ոլորտն անկում է գրանցում, անցալ տարի անկումը կազմեց մոտ չորս տոկոս, ինչը, բնականաբար, իր ազդեցությունն է թողնում հաջորդ տարվա վրա, այսինքն՝ 2019թ-ի բերքի մի մասն իրացվում է հաջորդ տարվա ամիսների ընթացքում: Էական նշանակություն է ունեցել նաև այն հանգամանքը, որ նախորդ տարվա ընթացքում կրճատվել են գյուղատնտեսության ոլորտի ներդրումներն ու վարկերը»,- Sputnik Արմենիայի հետ զրույցում ասաց նա:
Պարսյանի փոխանցմամբ՝ գյուղատնտեսությամբ զբաղված է մեր բնակչության մեկ երրորդը, և ՀՆԱ-ի 20-23 տոկոսը բաժին է ընկնում հենց այս ոլորտին: Տնտեսագետը ցավով է նշում, որ նախորդ տարվա ընթացքում կառավարությունը որոշեց, որ մեզ գյուղնախարարություն պետք չէ, մինչդեռ այս ոլորտը մեր երկրի համար ունի ռազմավարական նշանակություն, հետևաբար պետք է լինի պատասխանատու պաշտոնյա ոլորտի ցուցանիշների համար:
«Աշխարհը փոխել է մեր խնդիրները». նախագահը գյուղատնտեսներին առաջարկել է օգտվել իր կապերից
«Գյուղատնտեսության ոլորտի բոլոր ծրագրերի կատարողականի նկատմամբ վրահսկողությունն այժմ շատ ցածր մակարդակի վրա է: Մասնավորապես նախորդ տարվա պաշտոնական տվյալների համաձայն՝ Էկոնոմիկայի նախարարությունը ձախողել է գյուղատնտեսության ոլորտի բոլոր ծրագրերը, օրինակ՝ գյուղացիական տնտեսությունների աջակցության, հացահատիկի ցանքատարածությունների ընդլայնման, ոռոգման ցանցի բարելավման հարցերում: Չկա գեթ մեկ ծրագիր, որն ավարտին հասցված լինի»,- նշեց տնտեսագետը:
Պարսյանի խոսքով՝ գնաճի վրա ազդել են նաև այս տարվա ապրիլյան ցրտահարությունը, որը կտրուկ նվազեցրեց բերքատվությունը, նաև առանձին դեպքում հատկապես Արարատյան դաշտավայրում կորոնավիրոսով պայմանավորված աշխատանքների դադարեցումը, ինչպես նաև պարարտանյութերի մատակարարումների խաթարումը:
Կորոնավիրուսը կխանգարի՞ գյուղմթերքի արտահանմանը. ինչ է արել ՀՀ կառավարությունը
Վիճակագրական տվյալների համաձայն՝ բանջարեղենի ապրանքախմբում 2020թ-ի հունիսին՝ 2019-ի համեմատ արձանագրվել է 4.6% գնաճ։ Մրգի ապրանքախմբում գնաճի ցուցանիշը կազմել է 14.2%:
