ԵՐԵՎԱՆ, 7 հուլիսի — Sputnik. Հայաստանում ընթանում է Տաթև-Աղվանի-Կապան (Սյունիքի մարզ) ռազմավարական ճանապարհի շինարարությունը: Այս պահին հիմնանորոգվում է 12,5 կմ երկարությամբ ավտոճանապարհի հատվածը: Այս մասին Facebook-ի իր էջում գրել է ՀՀ վարչապետ Նիկոլ Փաշինյանը` հրապարակելով նաև տեսանյութ։
Նշվում է, որ նոր ասֆալտապատ ճանապարհը էականորեն կկրճատի ճանապարհը դեպի Կապան։
Պայմանագրի արժեքը 1 միլիարդ 170 միլիոն դրամ է (2,3 միլիոն դոլար)։
Հայտնի է, որ 2019 թվականին նույն մայրուղում հիմնանորոգվել է 6 կմ երկարությամբ «Սատանայի կամրջից» մինչև Տաթև – Աղվանի ընկած հատվածը։
Կորոնավիրուսը ճանապարհաշինությանը չի խանգարի․ պարետը թույլ է տվել սկսել աշխատանքները
Կառավարությունը ծրագրում է ևս երկու տեղամաս վերանորոգել։ Մասնավորապես, 2021 թվականին նախատեսվում է վերականգնել 17,5 կմ ճանապարհ, իսկ 2022 թվականին՝ 10 կմ:
Վերջին անգամ այդ ճանապարհը վերանորոգվել է 1980-ականներին։
Հիշեցնենք, որ ՀՀ վարչապետ Նիկոլ Փաշինյանը պարբերաբար տեսանյութեր է հրապարակում, որոնք վկայում են Հայաստանում մեծածավալ ճանապարհային շինարարության մասին։ 2019 թվականին Հայաստանում վերանորոգվել և կառուցվել է մոտ 440 կմ ճանապարհ, իսկ 2020 թվականին նախատեսվում է վերանորոգել 502 կմ:
