ԵՐԵՎԱՆ, 7 հուլիսի - Sputnik. Հայաստանը զարկ է տալիս ռազմարդյունաբերությանը։ ՀՀ վարչապետ Նիկոլ Փաշինյանը պաշտպանության նախարար Դավիթ Տոնոյանի և բարձր տեխնոլոգիական արդյունաբերության նախարար Հակոբ Արշակյանի ուղեկցությամբ այցելեց «Կալաշնիկով» ինքնաձիգի գործարան։
Շրջայցի ընթացքում ընկերության ներկայացուցիչը վարչապետին պատմեց, որ ձեռնարկությունում նաև օպտիկաէլեկտրոնային սարքեր են արտադրվում։
«Հասկանալու համար, թե ինչպիսի սարքեր են պետք բանակին, ընկերության ինժեներներն աշխատել են առաջնագծում, զորամասերում քննարկել և ուսումնասիրել»,- նշեց նա՝ ցույց տալով հայկական արտադրության, «Մոնթե» անունը ստացած գիշերային ջերմային նշանոցները։ Վարչապետը հպարտությամբ իր ձեռքը վերցրեց ջերմատեսիլները՝ ցույց տալով «Made in Armenia» և «Monte» գրությունները։
Փաշինյանը շրջեց գործարանում, տեսավ, թե ինչպես են տեղում հավաքվում «Կալաշնիկով» ինքնաձիգները։ Ընկերության ներկայացուցչի խոսքով՝ գործարանում հիմնական արտադրությունը չորս ուղղությամբ է կազմակերպվում. առաջին ուղղությամբ արտադրվելու են փամփուշտներ, որոնց թիվը նախատեսվում է տարեկան 150 միլիոն միավորի հասցնել։ Ընկերությունն արտադրելու է նաև ավտոմոբիլային և հակատանկային տեխնիկաների վերանորոգման համար անհրաժեշտ մասեր։ Եվ վերջապես արտադրության ամենակարևոր մասը հենց զենքն է. տարեկան նախատեսվում է 50 հազար միավոր ինքնաձիգ արտադրել։
Ավելի վաղ հայտնել էինք, որ Հայաստանում հուլիսի սկզբից կսկսեն 7,62 մմ տրամաչափի Կալաշնիկովի ինքնաձիգ թողարկել՝ արտադրող գործարանի լիցենզիայով։ Առաջին փուլում ինքնաձիգների հավաքման համար բաղադրիչ մասերը կմատակարարի Ռուսաստանի Իժևսկի մեխանիկական գործարանը, իսկ հետագայում արտադրության ամբողջական շղթան կկարգավորի Երևանում գրանցված «Նեյտրոն գիտաարտադրական միավորում ՓԲԸ»-ն։ Պայմանագիրը կնքվել է մայիսի 15-ին, լիցենզիան 10 տարով է և տարեկան մինչև 50 հազար ինքնաձիգի արտադրություն է ենթադրում։
Իր արդյունավետությամբ, պարզությամբ և հուսալիությամբ «Կալաշնիկովը» աշխարհի լավագույն ինքնաձիգն է համարվում, 55 երկրի սպառազինության մաս կազմում և տարբեր ժամանակներում լիցենզիայով թողարկվել է 12 պետություններում։
