ԵՐԵՎԱՆ, 3 հունիսի – Sputnik. Ռուս հայտնի երգչուհի Նադեժդա Բաբկինան Մաքսիմ Գալկինի «Музыкалити» յութուբյան շոուի ժամանակ պատմել է կոմայի մեջ գտնվելու ընթացքում իր զգացողությունների մասին։
Ապրիլի 1-ին 70-ամյա Նադեժդա Բաբկինան վատ է զգացել, նրան կորոնավիրուսի կասկածով տեղափոխել են հիվանդանոց։ Երգչուհու մոտ երկկողմանի թոքաբորբ է ախտորոշվել։ Քանի որ վիճակը վատթարացել է, ստիպված են եղել նրան միացնել թոքերի արհեստական օդափոխության սարքին։ Հիվանդությունը շարունակել է զարգանալ, և բժիշկները որոշել են երգչուհուն արհեստական կոմայի մեջ պահել։ Մոտ մեկ շաբաթ Բաբկինան անգիտակից է եղել։
Բարեբախտաբար, երգչուհուն հաջողվել է հաղթահարել հիվանդությունը։
Երգչուհին խոստովանել է, որ հիվանդության ընթացքում շատ էր վախենում։ Հաղորդավարի հարցին, թե արդյո՞ք լույս կա թունելի վերջում, նա դրական է պատասխանել։
«Ես լույս էի տեսնում, ձայներ չէի լսում․․․ մեծ ցենտրիֆուգա կար, որը պտտվում էր, ու հետո դըխկոց լսվեց ու կանգնեց»,- հիշում է երգչուհին։
Կորոնավիրուսը հաղթահարած Նադեժդա Բաբկինան ուղերձ է հղել տնից. տեսանյութ
Այնուհետև նա շողացող արծաթագույն լույս է տեսել։
«Գլխումս ամեն ինչ միանգամայն պարզ էր․ բժիշկների ձայնն էի լսում, այն, թե ինչ են խոսում իրենց «բժշկական լեզվով»։ Ի դեպ, երբ ինձ վերակենդանացման բաժանմունք էին տանում, ես նրանց ասացի․ «Կարևորը՝ թույլ չտալ, որ վախ մտնի մեջդ։ Ես չեմ վախենում, բայց սա ինձ անհայտ բան է։ Իմ կյանքը ձեր ձեռքերում է»»,-ասել է արտիստուհին։
Գալկինը Բաբկինային հայտարարել է «կորոնավիրուսի պաշտոնական հաղթող» և որպես մրցանակ հանձնել վարդագույն ժապավենով զարդարված ախտահանիչ։
«Դու հաստատեցիր հին ժողովրդական իմաստությունը՝ հույսը վերջինն է մեռնում»,-կատակել է Գալկինը։
«Էհ, գրողը տանի»,-ի պատասխան ծիծաղել է Բաբկինան։
Նշենք, որ հիվանդանոցից դուրս գրվելուց հետո Բաբկինան վերադարձել է «Модный приговор» հեռուստաշոուի նկարահանումներին։
Առողջապահության համաշխարհային կազմակերպությունը (ԱՀԿ) մարտի 11-ին նոր COVID-19-ի բռնկումը հայտարարել է համավարակ։ Կազմակերպությունը բոլոր երկրներին կոչ է արել միանալ վարակի դեմ ակտիվ պայքարին։
Բաբկինայի որդին հաստատել է, որ նրան հիվանդանոց են տեղափոխել․ կորոնավիրուսի կասկածներ կան
