ԵՐԵՎԱՆ, 29 հունիսի — Sputnik. Առաջիկա օրերին ԱԺ-ն արտահերթ նիստ կգումարի՝ Սահմանադրական դատարանի անդամների առաջադրման ու ընտրության հարցով: Այս մասին առկա տեղեկությունն այսօր լրագրողների հետ զրույցում հաստատեց ԱԺ «Բարգավաճ Հայաստան» խմբակցության անդամ Նաիրա Զոհրաբյանը:
«Մենք տեղյակ ենք, և բնականաբար, իրենց քայլերի տրամաբանությունը հուշում է, որ իրենք արտահերթ նիստ կհրավիրեն չորեքշաբթի կամ հինգշաբթի օրը, որպեսզի ՍԴ անդամներ ընտրեն»,- ասաց նա:
Նիստին մասնակցել- չմասնակցելու հարցը, Զոհրաբյանի խոսքով, ԲՀԿ-ում դեռ չի քննարկվել: Որոշում ընդունելուց հետո պատգամավորը խոստացավ այդ մասին տեղեկացնել նաև հանրությանը:
ԱԺ արտահերթ գումարելու որոշման մասին պաշտոնական որևէ տեղեկատվություն ԱԺ-ն այս պահի դրությամբ չի հրապարակել: Կառավարությունը ևս նման առաջարկով խորհրդարան չի դիմել:
Հիշեցնենք` հունիսի 26–ից ուժի մեջ մտավ ԱԺ–ի ընդունած սահմանադրական փոփոխությունների նախագիծը, որով կասեցվում են 12 տարի պաշտոնավարած ՍԴ դատավորների լիազորությունները։ Նույն նախագծով ՍԴ նախագահ Հրայր Թովմասյանը նախագահից դառնում է ՍԴ դատավոր։ Շատերը նախագիծը որակում են օրենքի կոպիտ խախտում, քանի որ այն չի ստորագրել նախագահ Արմեն Սարգսյանը և չի ուղարկվել ՍԴ՝ քննարկելու դրա սահմանադրական լինելը։
ՀՀԿ երիտասարդները բողոք-նամակ հանձնեցին Հայաստանում ԵՄ դեսպանին
ՍԴ երեք դատավորների թափուր տեղերի համար թեկնածուների առաջադրման ժամկետը սկսվում է հունիսի 27-ից: Ըստ օրենքի, մեկական թեկնածու պետք է առաջադրեն ՀՀ կառավարությունը, ՀՀ նախագահն ու Դատավորների ընդհանուր ժողովը՝ հաջորդաբար:
