ԵՐԵՎԱՆ, 26 հունիսի – Sputnik. ՀՀ վարչապետ Նիկոլ Փաշինյանն այսօր պարետատան նիստից հետո կայացած ճեպազրույցի ժամանակ նշեց, որ 2 օր առաջ Հայաստան էր այցելել Առողջապահության համաշխարհային կազմակերպության ներկայացուցիչը։
«Արձանագրեցինք, որ հակահամաճարակային կանոններն ունիվերսալ են, խնդիրն այդ կանոնները պահպանելու որակի մեջ է: Մեզ ոչ մի նոր «ռեկոմենդացիա» չի տրվել, դրանք նույնն են՝ դիմակ, սոցիալական հեռավորություն և ձեռքերի ախտահանում:ԱՀԿ-ի ներկայացուցիչն ասաց, որ այս պահին, ցավոք սրտի, չունենք պատվաստանյութ և չգիտենք՝ երբ կունենանք: Քանի դեռ չունենք պատվաստանյութ, միակ «պատվաստանյութը» մնում է դիմակը»,-ասաց Փաշինյանը:
Փաշինյանի խոսքով՝ ինքը երբեք չի բացառել, որ կարող է գալ մի իրավիճակ, երբ նորից գնանք համընդհանուր սահմանափակումների՝ հասկանալով, որ դա կարող է ջարդել մեր տնտեսության ողնաշարը, բայց մարդկանց կյանքը փրկելու այլ տարբերակ պարզապես չլինի։
Կորոնավիրուսն անվտանգ է այնքան, որքան պատերազմում` ադրբեջանցին․ Արմեն Մարտիրոսյան
Հավելենք` Հայաստանում կորոնավիրուսով վարակվածների թիվը վերջին մեկ օրում ավելացել է 759–ով և դարձել 23 247։
Այս պահին փաստացի բուժում է ստանում 10,557 (-68) մարդ, կատարվել է 105,046 (+2310) թեստավորում, առողջացել են վարակվածներից 12,149–ը (+814)։ Գրանցվել է մահվան 410 (+13) դեպք։ Այլ պատճառներով մահվան դեպքերի ընդհանուր թիվը` 131։
