ԵՐԵՎԱՆ, 26 հունիսի – Sputnik. Ադրբեջանի նախագահի՝ N զորամասի բացմանն ունեցած ելույթն ակնհայտորեն վկայում է, որ այդ երկրի իշխանությունները տեսնում են Հայաստանում տեղի ունեցող ժողովրդավարական փոփոխությունները որպես իրենց իշխանության սպառնալիք: ՀՀ արտաքին գերատեսչությունից այսպես են պատասխանել Ադրբեջանի նախագահ Իլհամ Ալիևին։
«Ակնհայտ է, որ մեկ ընտանիքի կողմից մի քանի տասնամյակ ձգվող իշխանությունը, որը պատմության մեջ կմնա կոռուպցիայի գլոբալ ինդեքսներում Ադրբեջանին առաջատար դիրքերի ապահովմամբ, տխրահռչակ լանդրոմատով, սեփական ժողովրդին խոսքի և այլ ազատությունների ճնշմամբ, բոլոր հիմքերն ունի կանխակալ վերաբերմունք ունենալ Հայաստանում տեղի ունեցող ժողովրդավարական փոփոխություններին»,–ասված է հաղորդագրության մեջ:
ՀՀ ԱԳՆ–ում նշում են, որ հակամարտության շահարկմամբ ժողովուրդների հանդեպ թշնամանքի խրախուսման մեջ իր լեգիտիմությունը փնտրող Ալիև գերդաստանը պետք է ոչ թե դասարակագային ատելություն ցուցաբերի ժողովրդավարական գործընթացների արդյունքում ձևավորված Հայաստանի իշխանությունների հանդեպ, այլ առնվազն ընդունի, որ ադրբեջանական ժողովուրդը նույնպես արժանի է ժողովրդավարության:
«Վստահ ենք, որ ժողովուրդներին կարող են հաշտեցնել և տարածաշրջանային խաղաղության և կայունությանը նպաստ բերել ոչ թե իշխանությունը ժառանգած, այլ ժողովրդի կողմից կազմավորված և ժողովրդի առջև հաշվետու իշխանությունները»,–ասված է հաղորդագրության մեջ:
Ուժով հարցի լուծման ճանապա՞րհն ես ընտրել, պարոն Ալիև, մենք պատրաստ ենք. Արցախի նախագահ
Հիշեցնենք, որ այսօր Ադրբեջանի նախագահ Իլհամ Ալիևը N զորամասի բացմանն ունեցած ելույթի ժամանակ նշել էր, որ Հայաստանում ժողովրդավարական հեղափոխությունը «սուտ» է ։ Բացի այդ, նրա խոսքով Հայաստանում զանգվածային բնույթ են ստացել կոռուպցիան, հափշտակությունները, կաշառակերությունը, իսկ ՀՀ վարչապետն ու նրա ընտանիքը զբաղվում են մաքսանենգությամբ։
