ԵՐԵՎԱՆ, 24 հունիսի – Sputnik. Հայկական արտադրության կորոնավիրուսի հաստատման ՊՇՌ թեստերը պատրաստ են։ Տեղեկությունը հայտնում է ՀՀ առողջապահության նախարար Արսեն Թորոսյանը։
Նոր հետազոտություն Հայաստանում. Covid 19–ը կբացահայտվի ևս մեկ թեստով
«Թեստերն օգտագործման կվերցնեն Առողջապահության նախարարության կողմից պետական պատվերով իրականացվող հետազոտությունների համար»,– Facebook–ի իր էջում գրել է նախարարը` նշելով, որ սա շատ լուրջ առաջընթաց է մեր բժշկագիտության և հիմնարար գիտությունների համար։
Թորոսյանը հատուկ շնորհակալություն է հայտնել Մոլեկուլյար կենսաբանության ինստիտուտին թեստերը մշակելու և արտադրելու համար, ինչպես նաև պարետատանը դրանց մշակման համար անհրաժեշտ պարագաներն ու նյութերը ձեռք բերելու և Հայաստան ներկրելու համար։
Հիշեցնենք` ՀՀ փոխվարչապետ, պարետ Տիգրան Ավինյանն ավելի վաղ հայտնել էր, որ Մոլեկուլյար կենսաբանության ինստիտուտն օրական 3000-5000 թեստ կարող է արտադրել, որը հնարավորություն կտա բավարարել մեր ներքին պահանջարկը։
Կորոնավիրուսով վարակվածների թիվը Հայաստանում հասել է 21 717–ի։
