ԵՐԵՎԱՆ, 24 հունիսի - Sputnik. Ապօրինի յուրացված գույքի գործերը քննելու համար Հայաստանում հատուկ մասնագիտացված դատախազներ և դատավորներ կլինեն։ «Պետական պաշտոններ զբաղեցնող անձանց վարձատրության մասին» օրենքում համապատասխան փոփոխություններ կատարելու նախագիծը ԱԺ արտահերթ նիստում ներկայացրեց Արդարադատության փոխնախարար Սրբուհի Գալյանը։
Ապօրինի գույքի բռնագանձման մասին գործերով զբաղվող դատավորներին կնշանակի Բարձրագույն դատական խորհուրդը՝ քաղաքացիական և քրեական գործերով դատավորների կազմից։
Բացի այդ, Գլխավոր դատախազությունում կբացվի գույքի ապօրինի յուրացման գործերի հատուկ վարչություն։ Կոռուպցիայի գործերով փոխդատախազը, համապատասխան վարչության պետը, նրա խորհրդականը և բաժնի ավագ դատախազը մյուսների համեմատ ավելի բարձր աշխատավարձ կստանան։
Վլադիմիր Գասպարյանին, Լևոն Երանոսյանին ու նախկին պաշտոնյաներին մեղադրանք է առաջադրվել
Պաշտոնյաների աշխատավարձը հաշվարկվում է 66 140 դրամ հիմնական դրույքաչափով, որը բազմապատկվում է գործակիցներով։ Գլխավոր դատախազի համար գործակիցը 15 է, փոխդատախազներինը՝ 11, իսկ կոռուպցիայի դեմ պայքարի գծով փոխդատախազինը՝ 12,5։ Գլխավոր դատախազության վարչության պետերի համար սահմանված է 9 գործակիցը, իսկ կոռուպցիայի դեմ պայքարի վարչության պետի համար՝ 10։
Բացի այդ, շուտով ՀՀ-ում կձևավորվի հատուկ հակակոռուպցիոն դատարան։ Այդ մասին որոշումն ընդունվել է մարտին։