ԵՐԵՎԱՆ, 23 հունիսի - Sputnik. Իսպանիայի Բարսելոնա քաղաքի El Liceui օպերային թատրոնը կորոնավիրուսով պայմանավորված երեքամսյա դադարից հետո վերսկսել է աշխատանքները, սակայն լրիվ այլ, յուրօրինակ ծրագրով։ The Guardian պարբերականը գրում է, որ վերաբացված օպերային թատրոնի առաջին հանդիսատեսը ոչ թե մարդիկ են եղել, այլ՝ բույսեր։ 2292 բույսեր՝ ծաղիկներ, թփեր, տնկիներ իրենց ծաղկամաններում «ներկա էին և վայելում էին» իտալացի կոմպոզիտոր Ջակոմո Պուչինիի ստեղծագործությունները՝ օպերային թատրոնի երաժիշտների կատարմամբ։
Իսկ երաժշտասեր մարդիկ, ի տարբերություն երաժշտասեր բույսերի, համերգը կարողացել են դիտել օնլայն հարթակում։
««Մարդը գրավել էր բնության տեղը, հիմա էլ հակառակն է», «Եթե անկեղծ ասեմ` այս հանդիսատեսներն ավելի ակտիվ են, քան սովորական դասական երաժշտության սիրահարները», «Տեսնես՝ ինչ բույսերի ընկերակցությամբ են կազմել այս ծրագիրը»»–, զվարճանում են մարդիկ համացանցում։
«Երախտագիտության համերգ». Նարեկ Հախնազարյանը նվագել է բժիշկների համար և հրավիրել նախարարին
Համերգը տեղի է ունեցել Իսպանիայում արտակարգ ռեժիմի սահմանափակումների վերացման օրը՝ հունիսի 22-ին։ Բոլոր 2292 բույսերն էլ նվիրվելու են բուժաշխատողներին՝ որպես շնորհակալություն նրանց կատարած ծանր աշխատանքի համար։
Իսպանիայում չորս ամսվա ընթացքում կորոնավիրուսով վարակվել է ավելի քան 293 հազար մարդ, մահացել են 28 324-ը։ Իսպանիայում երեք ամիս շարունակ խիստ արտակարգ իրավիճակ էր, որը հանվել է հունիսի 22-ին։
