ԵՐԵՎԱՆ, 23 հունիսի - Sputnik. ՀՀ առողջապահության նախարար Արսեն Թորոսյանը Հայաստանում ԱՄՆ–ի և Ֆրանսիայի դեսպանների հետ համատեղ ասուլիսի ժամանակ հայտարարեց, որ կորոնավիրուսի համավարակից հետո Հայաստանի առողջապահական համակարգն ավելի ուժեղ ու լավը կլինի։
«Նախ՝ դրան կնպաստեն նյութական մեր ձեռքբերումները՝ ավելացված մահճակալների քանակը, կառուցված ինտենսիվ թերապիայի կաբինետները և այլն։ Երկրորդ՝ մեր բժիշկների մոբիլիզացիոն ունակություններն էլ են բարելավվել, նրանք հիմա ավելի պատրաստ են ծանր իրավիճակներին», - շեշտեց Թորոսյանը։
Նա բարձր գնահատեց բուժաշխատողների աշխատանքը` ցավով նշելով, որ Հայաստանը շատ երկրների պես կորոնավիրուսի զոհ ունեցավ նաև բժիշկների շրջանում։
«Մեր առողջապահական համակարգը ավելի լավը կլինի բժիշկների մեծ էներգիայի ու ջանքերի շնորհիվ, դժբախտաբար նաև կյանքերի։ Մենք արդեն մեկ զոհ ունենք բժշկական անձնակազմից», - հայտնեց Թորոսյանը՝ հավանաբար նկատի ունենալով Հրազդանի ծննդատան 46-ամյա բուժքրոջը, որը մահացել էր հունիսի սկզբին։
«Խնդրում եմ` դիմակը վերցրեք ու դրեք»․ նախարարներն ու մարզպետները դուրս են եկել ֆլեշմոբի
Նախարարի խոսքով` Հայաստանի առողջապահական համակարգին բաժին է ընկնում պետության ՀՆԱ-ի ընդամենը 22,4%-ը, սակայն այն իրեն ավելի լավ է դրսևորում, քան ավելի մեծ մասնաբաժին ստացող այլ երկրների առողջապահական համակարգերը։
Ասուլիսի վերջում նախարարը ևս մեկ անգամ շնորհակալություն հայտնեց Հայաստանին աջակցած օտարերկրյա բոլոր բժիշկներին և առողջապահության նախարարություններին։
Կորոնավիրուսի դեմ պայքարում Հայաստանին օգնության կհասնեն նաև իտալացի ու լեհ բժիշկները
Հիշեցնենք, որ կորոնավիրուսի համավարակի դեմ պայքարում Հայաստանի բուժաշխատողներին օգնելու նպատակով արդեն իսկ մասնագետներ են եկել Ռուսաստանից, Լիտվայից, Ֆրանսիայից։ Սերբիան և Չինաստանը բուժամիջոցներ են ուղարկել, Վրաստանը նույնպես օգնություն է առաջարկել։
Հիշեցնենք, որ մարտի 16-ից Հայաստանում արտակարգ իրավիճակ է հայտարարվել, որն արդեն 3 անգամ երկարացվել է։ Եթե նորից չերկարաձգվի, արտակարգ դրության ռեժիմը կավարտվի հուլիսի 13-ին։ Հունիսի 23-ի դրությամբ Հայաստանում կորոնավիրուսի հաստատված 21006 դեպք կա։ Մահվան ելքով դեպքերը 372–ն են։
