ԵՐԵՎԱՆ, 22 հունիսի – Sputnik. ՀՀ արդարադատության նախկին նախարար Արփինե Հովհաննիսյանը Facebook–ի իր էջում հրապարակել է ԵԽ գլխավոր քարտուղար Մարիա Պեյչինովիչ Բուրիչի հայտարարությունը և դիմել իշխանությանը։
«Սա էլ ԵԽ գլխավոր քարտուղարի արձագանքը։ Կարճ ասած՝ Վենետիկը թույլ է տվել` փոխեք, բայց նախատեսեք անցումային շրջան, արեք աստիճանաբար։ Անգամ քարտուղարն է արձանագրել, որ չեք պահպանել Վենետիկի հանձնաժողովի դիրքորոշումը: Շարունակեք, խայտառակվեք մինչև վերջ»,– գրել է նա։
Հիշեցնենք՝ ավելի վաղ ՀՀ վարչապետ Նիկոլ Փաշինյանը հայտարարել էր, որ Սահմանադրական դատարանի հին կազմը պետք է փոխվի, քանի որ դատավորները, ինչպես նաև ՍԴ նախագահ Հրայր Թովմասյանն ընտրվել են նախկին կարգով և կարող են աշխատել մինչև 70 տարեկան, իսկ նոր անդամները՝ երկու անգամ վեցական տարով։
Փոփոխություններն ուզում էին իրականացնել հանրաքվեի միջոցով, սակայն կորոնավիրուսի պատճառով այն չեղարկվեց։
Հետո իշխանությունը որոշեց Սահմանադրությունը փոխել խորհրդարանի միջոցով։ ԱԺ–ն այսօր արտահերթ նիստում առաջին ընթերցմամբ ընդունեց «Իմ քայլի» ներկայացրած նախագիծը, որով առաջարկվում է պաշտոնանկ անել մինչև Սահմանադրության 7-րդ գլխի ուժի մեջ մտնելը նշանակված այն դատավորներին, որոնց պաշտոնավարման 12 տարին լրացել է։ Իսկ այն անդամները, որոնց պաշտոնավարման 12 տարին չի լրացել, ըստ նախագծի` կշարունակեն ՍԴ անդամի կարգավիճակում աշխատել մինչև 12 տարին լրանալը: Թափուր մնացած տեղերը կլրացվեն մեկամսյա ժամկետում:
Իսկ ինչ վերաբերում է Սահմանադրական դատարանի նախագահին, նախագծով նախատեսվում է նրա պաշտոնավարումը ևս դադարեցնել ու պաշտոնը թափուր մնալուց հետո ընտրել նոր նախագահ:
Իշխող խմբակցության հեղինակած օրենքի նախագծի ընդունումից հետո փաստորեն Հրայր Թովմասյանը, որի պաշտոնավարման 12 տարի չի լրացել, կազատվի ՍԴ նախագահի պաշտոնից, բայց կշարունակի աշխատել որպես ՍԴ դատավոր: Իսկ ՍԴ երեք անդամները՝ Ալվինա Գյուլումյանը, Ֆելիքս Թոխյանն ու Հրանտ Նազարյանը, որոնք ավելի քան 12 տարի աշխատել են ՍԴ դատավորի պաշտոնում, կգնան թոշակի:
Վենետիկի հանձնաժողովը քննադատել է Ազգային ժողովի` ՍԴ-ի մասին սահմանադրական փոփոխությունները, քանի որ առաջարկել էր անցումային շրջան սահմանել դատաիրավական համակարգի գլխավոր «խաղացողներին» փոխելուց առաջ։ Եվրոպայի խորհրդի գլխավոր քարտուղար Մարիա Պեյչինովիչ Բուրիչն էլ ՀՀ իշխանությանը կոչ է արել առաջնորդվել Վենետիկի հանձնաժողովի խորհրդատվություններով` աստիճանաբար կյանքի կոչելով 2015 թվականի Սահմանադրության համապատասխան դրույթները՝ եվրոպական չափանիշներին համապատասխան։
Իշխանությունների սրտի ՍԴ նախագահի էտալոնը Վահե Գրիգորյանն է. ԲՀԿ
