ԵՐԵՎԱՆ, 22 հունիսի – Sputnik. Հաշվի առնելով Հայաստան մեկնելու համար գրանցված քաղաքացիների մեծաթիվ լինելու հանգամանքը (ավելի քան 25 հազար քաղաքացի)` հունիսի 22-ին ՌԴ–ում Հայաստանի դեսպանությունը դադարեցնում է քաղաքացիների առցանց ցուցակագրումը։ Տեղեկությունը հայտնում է դեսպանության մամուլի ծառայությունը։
«Համաճարակով պայմանավորված իրավիճակում, ցավոք, իրատեսական չի դիտվում ապահովելու բոլոր ցանկացողների վերադարձը չարտերային չվերթերով։ Առաջիկայում՝ մինչև կանոնավոր ուղևորափոխադրումների վերսկսումը, դեսպանությունը կշարունակի չարտերային չվերթերի կազմակերպման շուրջ աշխատանքները՝ ուղղված հաշվառված քաղաքացիներին հայրենիք վերադարձնելուն»,– նշված է հաղորդագրության մեջ։
Հաշվի առնելով դեսպանությունում գրանցված, սակայն չվերթերից հրաժարվող քաղաքացիների մեծաթիվ լինելու հանգամանքը, ինչպես նաև հաստատումից հետո չվերթերին չներկայանալու փորձը` դեսպանությունը քայլեր կմշակի նաև այդ ուղղությամբ։
ՌԴ–ում Հայաստանի դեսպանությունը խոստանում է չարտերային թռիչքների չվացուցակի մասին հայտնել առաջիկայում։ Հիշեցնենք`այսօր, ժամը 18։00-ին, «Ռեդ Վինգս» ընկերությունը Մոսկվա-Երևան չարտերային թռիչք կիրականացնի «Դոմոդեդովո» օդանավակայանից։
