ԵՐԵՎԱՆ, 22 հունիսի – Sputnik. ՀՀ վարչապետ Նիկոլ Փաշինյանը կարծում է, որ Հայաստանում տեղի ունեցող որոշ դեպքերի առնչությամբ հեղափոխության կողմակիցները զանգվածային հավաքներ կարող էին անցկացնել, սակայն վերջիններս ուղղակի պահել են արտակարգ դրության պայմանները։ Փաշինյանը նման կարծիք հայտնեց պարետատան նիստից հետո` անդրադառնալով «Բարգավաճ Հայաստանի» հավաքներ անցկացնելու հանգամանքի իրավաչափությունը ՍԴ–ում վիճարկելու նախաձեռնությանը։
ՀՀ ԱԱԾ-ն հունիսի 14-ի վաղ առավոտից խուզարկություն էր իրականացրել ԲՀԿ առաջնորդ, պատգամավոր Գագիկ Ծառուկյանի` Առինջի առանձնատանը: Հենց այդ օրը Ծառուկյանը կանչվել էր ԱԱԾ` հարցաքննության, իսկ ԱԱԾ–ի մոտ ԲՀԿ ղեկավարի աջակիցներն էին հավաքվել։ Ոստիկանությունը 200-ից ավել մարդ էր բերման ենթարկել։ Օրեր անց ԲՀԿ–ական պատգամավոր Իվետա Տոնոյանը հայտնել էր` ԲՀԿ–ն ՍԴ կդիմի։
«Ո՞վ է ասել, որ պոտենցիալ հանրահավաքի 100 անգամ մեծ թվով մասնակիցներ չէին ուզում դժգոհություն հայտնել որոշ կոռուպցիոներների գործունեության առնչությամբ։ Դեռ հարց է` հեղափոխության կողմնակիցնե՞րը, թե՞ կառավարության հակառակորդներն ավելի մեծաքանակ հանրահավաքներ կանեին, և դեռ հարց է` ովքե՞ր այդ հանրահավաքով շատ ավելի արագ հարցեր կլուծեին ու կլուծեն»,–ասաց Փաշինյանը։
«Վստահ չեմ, որ ՍԴ այս նույն կազմը կքննի ԲՀԿ–ի դիմումը». Ալեն Սիմոնյան
Նրա խոսքով` կան մարդիկ, որ գերագնահատում են Հայաստանում հանրահավաքներ անցկացնելու իրենց ուժը, քանի որ եթե հանրահավաք ասելով` նկատի ունեն 10 000 դրամով սահմանափակ քանակով մարդկանց հրապարակ բերելը, ապա նրանց հույսերը շատ արագ կփլուզվեն։
Փաշինյանը հավելեց` խնդիր է դրված, որ հնարավորինս քիչ մարդիկ վարակվեն, և եթե կրթական ոլորտի գործունեությունն է սահմանափակվել, ապա հավաքներ անցկացնելու առումով մեկնաբանությունները տեղին չեն։
