ԵՐԵՎԱՆ, 21 հունիսի - Sputnik. Բուժաշխատողի մասնագիտական տոնի առիթով Հայաստանի բուժաշխատողներին յուրահատուկ ձևով շնորհավորել է «Տաշիր» բարեգործական հիմնադրամը։ Մամուլի ծառայությունից հայտնում են, որ տոնի առթիվ «Շտապօգնության» ծառայության բոլոր բժիշկները, բուժաշխատողներն ու վարորդները դրամական պարգևատրում կստանան։ Այսպիսով, ընդհանուր 150 միլիոն դրամի (300 հազար ԱՄՆ դոլար) չափով ֆինանսական աջակցություն է տրվում «Շտապօգնության» ծառայության 1346 աշխատակցի։
Այս նախաձեռնությունն անձամբ «Տաշիր» ընկերությունների խմբի և համանուն հիմնադրամի նախագահ, գործարար, բարերար Սամվել Կարապետյանինն է՝ ի աջակցություն կորոնավիրուսի դեմ պայքարին։
«Դժվարին ժամանակներում ժողովրդին օգնելը մեր առաջնային խնդիրն է։ Մենք միշտ անելու ենք այն ամենը, ինչը մեր ուժերի սահմաններում է, որպեսզի աջակցենք բժիշկներին և պաշտպանենք մարդկանց առողջությունն ու կյանքը նման բարդ իրավիճակներում»,- ընդգծել է գործարարը։
Ավելի վաղ հայտնել էինք, որ «Տաշիր» բարեգործական հիմնադրամը Հայաստանին 100 միլիոն դրամ է տրամադրել կորնավիրուսի դեմ պայքարի համար։ 50 միլիոն դրամը տրվել է «Նորք» ինֆեկցիոն հիվանդանոցին։ Միջոցների մեծ մասն ուղղվել է կորոնավիրուսի դեմ պայքարում ընդգրկված բժշկական անձնակազմին խրախուսելուն։ Գումարի մյուս մասը ծառայել է հիվանդանոցի վերազինմանը։ Եվս 50 միլիոն դրամ «Տաշիրն» ուղղել է նաև կառավարական հաշվին, որը ստեղծվել է կորոնավիրուսին հակազդելու համար։
Դուք կորոնավիրուսի դեմ պայքարի մեր հերոսներն եք. Փաշինյանը շնորհավորել է բուժաշխատողներին
Մարտի 16-ին «Տաշիր» հիմնադրամը «Հայաստանի էլեկտրական ցանցեր» ընկերության հետ համատեղ անհրաժեշտ բուժպարագաներ էր փոխանցել է ՀՀ պաշտպանության նախարարություն, Հայաստանում Կարմիր խաչի ներկայացուցչություն, Հիվանդությունների վերահսկման և կանխարգելման ազգային կենտրոն, Էջմիածին քաղաքի քաղաքապետարան, Երևանի թիվ 1 և «Նորք» տուն-ինտերնատներ, Գյումրու և Վարդենիսի տուն-ինտերնատներ, ինչպես նաև «Վանաձորի տարեցների տուն» հիմնադրամ:
Երկիրը «պատերազմի» մեջ է, բուժաշխատողներն` առաջնագծում. Արսեն Թորոսյան
Ավելի ուշ հիմնադրամը լրացուցիչ միջոցներ է ուղարկել՝ 50 մլն դրամի չափով, «Հայաստան» համահայկական հիմնադրամին։ Միջոցների մի մասն ուղղվել է կորոնավիրուսի դեմ պայքարին, մյուս մասը՝ Ռուսաստանից Հայաստանի քաղաքացիների տեղափոխման ֆինանսավորմանը։
