ԵՐԵՎԱՆ, 19 հունիսի – Sputnik. ՀՀ երկրորդ նախագահ Ռոբերտ Քոչարյանի պաշտպան Արամ Վարդևանյանը մանրամասներ ներկայացրեց, թե ինչ կարծիք է հայտնել Վենետիկի հանձնաժողովի` ՀՀ քրեական օրենսգրքի 300.1 հոդվածի` Սահմանադրությանը համապատասխանելու առումով։
Լրագրողների հետ հանդիպման ժամանակ Վարդևանյանը նշեց, որ հանձնաժողովի համար մեր սահմանադրական կարգը տապալելուն առնչվող 300.1 հոդվածն այնքան անորոշ է, որ մտածել են` թարգմանական խնդիր կա։
«Վենետիկի հանձնաժողովը, ծանոթանալով 300.1 հոդվածի դրույթներին, արձանագրել է, որ դրանք այն աստիճան անորոշ են, որ գուցե թարգմանության խնդիր կա, որ հարցերն այդպես էլ չեն հասկացվել։ Այսինքն` գործ ունենք այդ աստիճան անորոշության մասին»,–ասաց Վարդևանյանը։
Նա հայտնեց նաև, որ Վենետիկի հանձնաժողովն ուսումնասիրել է միջազգային փորձն ու եկել այն եզրահանգման, որ առհասարակ սահմանադրական կարգի նկատմամբ ոտնձգությունները պարտադիր ունենում են բռնության կամ բռնության տարր։ Վարդևանյանը հայտնեց` ՀՀ Սահմանադրության 300.1 հոդվածում առկա չէ նման տարր։
Ըստ Վարդևանյանի` Վենետիկի հանձնաժողովն արձանագրել է, որ սահմանադրական կարգի տապալումն այնպես, ինչպես կա Հայաստանում, չկա միջազգային փորձում։
Պաշտպանը նշեց, որ հանձնաժողովի կարծիքում մեկ կարևոր դրույթ կա` երբ նման տեսակ ընդհանուր տեսակ հոդվածներ են լինում, ապա դրանք անորոշության ռիսկեր են պարունակում։ Այդ անորոշության ռիսկերն էլ, ըստ հանձնաժողովի տեսակետի, պետք է մեկնաբանվեն հօգուտ անձի իրավունքների։
Վարդևանյանը նշեց նաև, որ ստացվում է` այս հոդվածն այն աստիճան անորոշ ու անհասկանալի է, որ նույնիսկ Վենետիկի հանձնաժողովի համար պարզ չի եղել ոչինչ։ Նա հայտնեց նաև, թե քանի որ հանձնաժողովի կարծիքներն արդեն իսկ ստացվել են, ուստի ՀՀ ՍԴ–ն Քոչարյանի գործով վարույթը պետք է սկսի։
Ռոբերտ Քոչարյանը դատի է տվել Քրեակատարողական ծառայությանը
Հիշեցնենք, որ Քոչարյանի գործով ՍԴ-ն 2019-ի հուլիսի 18–ին որոշել էր խորհրդատվական կարծիք ստանալու համար դիմել ՄԻԵԴ և Վենետիկի հանձնաժողով` Երևանի ընդհանուր իրավասության դատարանի և Քոչարյանի դիմումների հիման վրա՝ ՀՀ քրեական օրենսգրքի 300.1-րդ հոդվածի` սահմանադրական կարգը տապալելու, Սահմանադրությանը համապատասխանելու հարցը որոշելու վերաբերյալ։
Վերաքննիչ քրեական դատարանի դատավոր Արսեն Նիկողոսյանը երեկ մասնակի բավարարեց Ռոբերտ Քոչարյանի կալանքը փոխելու միջնորդությունները մերժելու մասին դատարանի որոշման դեմ բողոքը։ Քոչարյանն ազատ կարձակվի գրավի դիմաց։
ՀՀ երկրորդ նախագահին մեղադրանք է առաջադրվել 2008 թ–ի մարտի 1-ի բողոքի ակցիաները ցրելու ժամանակ սահմանադրական կարգը տապալելու համար։ Նա իրեն ուղղված մեղադրանքները քաղաքական հետապնդում է համարում։ 2018թ-ին Քոչարյանին երկու անգամ ձերբակալեցին:
2019 թվականի հունիսի վերջին նա ձերբակալվեց երրորդ անգամ: Երկրորդ նախագահին նաև կաշառք ստանալու մեղադրանք է առաջադրված։
«Կենսագրությանս հիման վրա բրենդ է ձևավորվել, որը չեմ խախտելու». Քոչարյանը` դատավորին
