ԵՐԵՎԱՆ, 18 հունիսի – Sputnik. «Երևան Մոլ» առևտրի կենտրոնը հայտարարություն է տարածել, որում մեկնաբանել է երեկ պարետատան հրապարակած տեղեկությունն այն մասին, որ մոլի աշխատանքը 24 ժամով կասեցվել է։ Իրականում առևտրի կենտրոնը շարունակում է աշխատել, խանութներն ու ֆուդկորտը բաց են, պարետատունը խախտումներ է արձանագրել միայն գրասենյակում, որն էլ փակվել է 24 ժամով։
«Հունիսի 17-ին իրականացված հերթական ստուգման ժամանակ հայտնաբերվել են կանոնների խախտումներ «Երևան Մոլի» վարչական գրասենյակում, մասնավորապես, երկու աշխատակից չի կրել դիմակ, նրանց միջև հեռավորությունը եղել է պակաս, քան մեկուկես մետրը և ջերմաչափման գրանցումը կատարվել է օրական մեկ անգամ։ Այսօր` հունիսի 18-ին, ժամը 12։00-ից սկսած 24 ժամով փակվել է միայն մոլի գրասենյակային մասը։ «Երևան Մոլում» գործող բոլոր խանութները և ֆուդկորտը շարունակում են իրենց բնականոն աշխատանքը», - պարզաբանել է «Երևան Մոլի» մարքեթինգի և հասարակայնության հետ կապերի տնօրեն Շուշան Ավագիմյանը։
«Մուլտի Գրուպն» ու «Երևան մոլը» ժամանակավորապես փակվել են. պարետն է որոշել
«Երևան Մոլի» հայտարարության մեջ ասված է, որ առևտրի կենտրոնի ամբողջ տարածքում ամեն օր ախտահանման աշխատանքներ են կատարում, իսկ այցելուներին տրամադրվում են դիմակներ և ձեռնոցներ։
Հիշեցնենք` կորոնավիրուսի պատճառով մարտի 16-ին Հայաստանում արտակարգ դրություն հայտարարվեց, որը 3 անգամ արդեն երկարաձգվել է, վերջինը` հունիսի 13–ին` մեկ ամսով։ Մայիսի 18-ից վերսկսվել էր տրանսպորտի, առևտրի կենտրոնների, ռեստորանների աշխատանքը, սակայն պարետատան խիստ ցուցումներով։ Հակահամավարակային կանոնները չպահպանող սուբյեկտների աշխատանքը կասեցվում է։
